Kolledj dırektory qashyqtan bilim berýdiń artyqshylyqtaryn aıtty
NUR-SULTAN. QazAqparat – Karantın kolledjderde qashyqtan bilim berýdi engizý protsesin jedeldetti. Bul týraly elordadaǵy Polıtehnıkalyq kolledjdiń dırektory Qasymhan Senǵazyev málim etti, dep habarlaıdy QazAqparat tilshisi.
«Qashyqtan oqytýǵa biz 16 naýryzdan bastap kóshtik, sonymen qatar barlyq kolledjder de ótti. Bilim berý protsesine qashyqtan oqytýdy keńinen engizý sharalaryn Polıtehnıkalyq kolledj eki jyl boıy pysyqtap kelgen bolatyn. Karantın qashyqtan oqytýǵa sebep boldy. Bizde buǵan deıin osy sharalar úshin keıbir qujattar jetispegen edi, ıaǵnı mınıstrliktiń quqyqtyq aktileri. Qashyqtan oqytýǵa kóshtik, osydan keıin bul baǵytty meńgerý jeńildeý bolady», - dedi dırektor onlaın-brıfıng barysynda.
Osy oraıda ol búginde álemde qashyqtan oqytý qarqyndy damyp kele jatqanyn ári oǵan suranys joǵary ekenin atap ótti.
«Bolashaqta aqparattyq jáne tsıfrlyq resýrstardy paıdalaný arqyly zamanaýı tehnologııalardy keńinen qoldaný jeńil bolady. Bul turǵyda ońtaıly tustary barshylyq, sebebi stýdentter derbes oqýǵa daǵdylanyp keledi. Stýdentter óz betinshe bilim alýǵa kóp kóńil bóle bastady. Óz kezeginde oqytýshylar da zamanaýı tehnologııalardy ıgerýge nazar aýdaryp, beınesabaqtar jazýǵa kirisip ketti. Negizi, bul tájirıbe karantın aıaqtalǵannan keıin de qajet bolady», - Qasymhan Senǵazyev.
