Kolledj dırektorlary mektep muǵalimderinen tómen jalaqy alady – mınıstr

NUR-SULTAN. QazAqparat – QR Oqý-aǵartý mınıstri Ashat Aımaǵambetov kolledj dırektorlarynyń tómen jalaqy alatynyn synǵa aldy, dep habarlaıdy QazAqparat tilshisi.

Onyń aıtýynsha, kolledj dırektorlary mektep muǵalimderinen tómen eńbekaqy alady.

«Sondyqtan bul jerde óte mańyzdy ózgerister qajet. Mınıstrliktiń de óz ustanymy bar – biz tıisti memlekettik organdarmen birlesip, kelesi oqý jylynda bul mindetti tolyq sheshý úshin bar kúshimizdi salamyz», - dedi mınıstr elordada ótken tamyz konferentsııasynyń «Eńbek naryǵy jáne kásiptik bilim: jańa múmkindikter» paneldik sessııasynda.

A. Aımaǵambetov atqarylǵan jumys nátıjelerin atap ótti. Qazirgi ýaqytta kolledj pedagogteri sanatyn kótergeni úshin qosymsha aqy ala alady. Buryn bul attestattaýdan ótý úshin jasalatyn.

Sondaı-aq 180 kolledj qaıta jabdyqtaldy, kolledjderde ózderiniń bilim berý baǵdarlamalaryn naryq pen jumys berýshilerdiń talaptaryna ózgertý múmkindigi paıda boldy.