Kóliktiń qozǵaltqyshyn uzaq qyzdyrǵany úshin aıyppul nege salynady
ASTANA. KAZINFORM — Senator Marat Qojaev qysta avtokóliktiń qozǵaltqyshyn uzaq qyzdyryp turǵandarǵa aıyppul salýǵa qatysty suraqqa jaýap berdi.
Depýtat kólik qozǵaltqyshyn 5 mınýttan artyq qyzdyrǵandarǵa aıyppul salý normasy birazdan beri bar ekenin eske saldy.
- Bul talap ekologııalyq normalardy oryndaýǵa baǵyttalǵan. Bizde aýa qatty lastanǵan, ıaǵnı bul jaǵdaı iri qalalarda erekshe baıqalyp otyr. Júrgizýshilerdi osy bap boıynsha jaýapqa tartý úshin naqty dálelder bolýy kerek. Osy oraıda beınejazba men naqty ýaqytyn tirkeý qajet. Eger osyndaı dálelder bolsa, bul adamdar ákimshilik jazaǵa tartylady. Mundaı normalar damyǵan elderde de bar, - dedi M. Qojaev Senattyń jalpy otyrysynan keıin tilshiler suraǵyna jaýap bere otyryp.
Aıta keteıik, osy norma aıasynda aıyppul 5 AEK somasynda qarastyrylǵan. Al osy talapty qaıtadan buzǵandarǵa 10 AEK aıyppul salynady.
Eske salsaq, 2024 jylǵy qazan aıyna deıin Marat Qojaev Іshki ister mınıstriniń birinshi orynbasary laýazymyn atqaryp keldi. Prezıdent Jarlyǵymen Marat Qojaev Qazaqstan Parlamenti Senatynyń depýtaty bolyp taǵaıyndaldy.