Kóliktik derekter qorynyń aqparattyq-taldaý júıesin damytýǵa erekshe nazar aýdarǵan jón — Úkimet basshysy
ASTANA. KAZINFORM — Kólik aǵyndaryn boljaý men basqarý úshin jasandy ıntellektini kezeń-kezeńmen engizý qajet. Bul týraly Úkimet otyrysynda Premer-mınıstr Oljas Bektenov aıtty.
— Jýyrda ótken keńeste Memleket basshysy kólik-tasymal salasyn damytý úshin avıahabtardy damytýdyń basymdyǵyn atap ótti. Ushý geografııasyn keńeıtý, jańa sheteldik avıatasymaldaýshylardy tartý, elimizdiń áýejaılary arqyly júk jáne jolaýshylar aǵynyn arttyrý baǵytynda jumys júrgizilip jatyr. Áýejaı ınfraqurylymyn jańǵyrtý, arnaıy tehnıkany jańartý jáne jolaýshylar men áýe kompanııalaryna qyzmet kórsetý servısterin tsıfrlandyrý júzege asyrylyp jatyr. Munyń bári qazaqstandyq áýejaılardy básekege qabiletti óńirlik habtarǵa aınaldyrýǵa múmkindik beredi, — dedi Oljas Bektenov.
Úkimet basshysy kóliktik derekter qorynyń aqparattyq-taldaý júıesin damytýǵa erekshe nazar aýdarý qajettigin aıtty.
— Qazirdiń ózinde derekterdiń biryńǵaı massıvi jasalyp, júk qozǵalysyn baqylaý jáne ótkizý pýnktteriniń júktemesine monıtorıng júrgizý modýlderi iske asyryldy. Bul osal tustardy tez anyqtap, ýaqtyly sheshim qabyldaýǵa múmkindik beredi. Sonymen qatar júıeniń qazirgi monolıtti arhıtektýrasy ony ıntegratsııalaý men ınnovatsııalyq sheshimderdi engizý kezinde qıyndyqtar týǵyzyp otyr. Osyǵan baılanysty Kólik mınıstrligi Tsıfrlyq damý mınıstrligimen birge atalǵan júıeni ashyq ınterfeısteri bar modýldik jáne masshtabtalatyn arhıtektýraǵa kóshirýdi qamtamasyz etýi qajet. Bul rette kólik aǵyndaryn boljaý men basqarý úshin jasandy ıntellektini kezeń-kezeńmen engizgen jón, — dedi Úkimet basshysy.
Aıta keteıik, Úkimet otyrysynda elimizdiń kólik-tranzıt salasyn damytý men tsıfrlandyrý máselesi talqylandy.
Budan buryn Bektenov egis alqaby bekitilgen kesteden 1 gektar artyq egilse, onda oǵan 1 tamshy da sý berilmeıtinin eskertti.