Kólikterge shekteý: almatylyqtar men óńir júrgizýshilerine talap birdeı bola ma
ALMATY. KAZINFORM – Almatyda 2027 jyldan bastap LEZ aımaǵynda kólikterge arnalǵan jańa talaptar kúshine enedi.
Qazir Bógenbaı batyr, Jeltoqsan kóshesi, Abaı dańǵyly jáne Dostyq dańǵyly arasynda ornalasqan aýmaqta tómen emıssııaly aımaqtyń (LEZ) jobasy pılottyq rejımde tekserilip jatyr.
Almaty qalasynyń Ekologııa jáne qorshaǵan orta basqarma basshysynyń orynbasary Arshat Bahtygereevtiń aıtýynsha, pılottyq joba aıasynda negizinen zertteý jumystaryna kóńil bólingen. Onyń ishinde sol aýmaqtan qansha jáne qaı jylǵy kólikterdiń ótetini, júk kólikteri men jeńil kólikterdiń úlesi týraly derekter jınalyp jatyr.
Alaıda 2027 jyldan bastap jańa ekologııalar talaptar kúshine enedi. Onyń ishinde LEZ aımaǵynda kóliktiń shyǵaratyn zııandy gazdary belgilengen ekologııalyq normadan asatyn bolsa, júrgizýshige aıyppul salynady. Bul jaǵdaıǵa baılanysty adamdar arasynda ártúrli pikir bar. Onyń ishinde almatylyqtardyń kóligine bir bólek, Almaty oblysy men ózge óńirlerden keletin kólikterge qatańyraq talap qoıylatyn degen boljam da aıtylady. Bul suraqqa baılanysty Arshat Bahtygereev túsinikteme berip, jaǵdaıdyń aq-qarasyn ajyratty.
- Qoǵamda osyndaı oı-pikir bar. Biraq biz eshkimdi bóle almaımyz. Sen qalanyń turǵynysyń, sen Almaty oblysynyń turǵynysyń nemese basqa óńirden keldiń dep aıta almaımyz. Kólikter qalaǵa kúndelikti kirip-shyǵady. Biraq bárine talaptar birdeı bolady, - dedi ol.
Ekologııa jáne qorshaǵan orta basqarmasynyń ókilimen tolyq suhbatty osy materıaldan oqı alasyzdar.
