Kólikten birtúrli daýys estildi: Ál-Farabıdegi jol apaty boıynsha sotta aıyptalýshy sóıledi

Búgingi sot otyrysynda 32 jastaǵy aıyptalýshy Aleksandr Paktan jaýap alyndy. Onyń aıtýynsha, meıramhanadaǵy otyrystan keıin ol kólikke otyryp, Dostyq dańǵylymen tómen qaraı baǵyt alǵan. Ál-Farabı dańǵylyna jaqyndaǵan sátte Zeekr kóliginiń basqarý panelinde aqaý baryn bildiretin eskertý shamdary janǵan.

— Ál-Farabı dańǵylyna shyqqan kezde kólikten birtúrli gýildegen dybys shyǵa bastady. Onyń qaıdan shyqqanyn túsinbedim. Osyǵan deıin mende BMW kóligi bolǵan edi. Onda bir mehanıkalyq aqaý belgileri paıda bolǵanda, men gazdy basyp, aınalymdy arttyratynmyn. Sonyń nátıjesinde usaq aqaýlar ózdiginen joǵalyp ketetin. Bul kólikte de sony istep, gazdy bastym da, sol jaq qatardan oń jaq qatarǵa aýysa bastadym. Dál osy sátte kóliktiń óz jolaǵynda ustaý júıesi kenetten iske qosylyp ketken bolýy múmkin. Kólik birden jıektasqa soǵylyp, sodan qarsy betke ótip ketti. Kólik maǵan múldem baǵynbady, men ońǵa-solǵa burýǵa tyrystym, biraq esh nátıje bolmady, tejegish te istemeı qaldy. Osydan keıin jol apaty boldy, — dedi Aleksandr Pak.

Aıyptalýshy kóliktiń basqarý panelindegi belgilerdi túsinbeýin Zeekr kóligin birneshe aı buryn ǵana satyp alǵanymen túsindirdi. Onyń sózinshe, jańa kóliktiń barlyq erekshelikterin tolyq zerttep úlgermegen.

Sondaı-aq ol óz kinásin moıyndaǵanymen, óz atyna tapsyrys berilgen ishimdikterdiń kóbin ishpegenin málimdedi.

— Meıramhanaǵa jınalýǵa eshqandaı erekshe sebep bolǵan joq. Jaı ǵana jumanyń keshi edi, dostarmen birge keshki as ishýge jınaldyq. Dostar óz tanystaryn shaqyrdy, men tipti ol jaqtaǵy adamdardyń bárin tanı bermeıtinmin. Ózime syra tapsyrys berip, eki urttadym da, unamaǵan soń ishpeı qoıdym. Mekemedegiler meni mas boldy dep aıtyp jatyr, biraq men ózimdi mas sanamaımyn. Al ústeldegi basqa ishimdikterge keletin bolsaq, kimniń ne iship, ne jegenin qadaǵalaǵan joqpyn. Ol jerde ishimdikterdiń tapsyrys berilýi olardyń bárin men ishti degendi bildirmeıdi. Shotty men tóledim, ádette biz kezekpen tóleıtinbiz nemese aqsha shyǵaratynbyz, — dedi sottalýshy.

Odan bólek Pak óz kinásin moıyndaǵanymen, prokýrordyń «soqtyǵysý sátinde kóliktiń jyldamdyǵy saǵatyna 219 shaqyrymǵa jetti» degen ýájine kelispeıtinin aıtty.

— Jol boıyndaǵy foto-beıne málimetter usynyldy, biraq Ál-Farabı men Dostyq qıylysyndaǵy derekter joq. Ál-Farabı men Dostyq aralyǵynda mundaı jyldamdyqqa jetý úshin men ol jerge deıin 150-160 km/saǵ jyldamdyqpen kelýim kerek edi. Olaı bolsa, nege maǵan eshqandaı aıyppul kelmegen nemese beınebaqylaýǵa túspegen? Men ol jerde 80 km/saǵ jyldamdyqpen kele jattym, keıin gazdy basqanda jyldamdyq bálkim 130-ǵa jetken shyǵar, biraq 220 km/saǵ jyldamdyq bolýy múmkin emes, — deıdi aıyptalýshy.

Sondaı-aq Aleksandr Pak óz basyn jasyrý maqsatynda kóliktiń memlekettik nómirin ádeıi aýystyrdy degen aıypty teriske shyǵardy. Ol eki nómirdiń de ózine tıesili kólikterdiki ekenin túsindirdi.

Osy jaýaptaryn keıin ol protsestik quqyǵyn paıdalanyp, advokattar men prokýrordyń suraqtaryna jaýap berýden bas tartty. Ol tek sýdıanyń suraqtaryna ǵana jaýap berýge kelisti. Óz sheshimin ol qoǵam men BAQ tarapynan bolyp jatqan úlken qysymmen túsindirdi.

Eske salaıyq, 2026 jylǵy 21 naýryzǵa qaraǵan túni Zeekr kóliginiń júrgizýshisi ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty.

Іs boıynsha sot otyrysynda jábirlenýshiler Aleksandr Pakke keshirim berdi.

Sondaı-aq Ál-Farabıde dańǵylynda bolǵan jol apatynyń beınejazbasy sotta kórsetildi.

Birneshe kýáger sotta jańa derektermen bólisti.