Kóliktegi polıtseıler 101 sheteldiktiń kóshi-qon zańnamasyn buzǵanyn anyqtady
ASTANA. KAZINFORM – «Zań men tártip» qaǵıdatyn iske asyrý aıasynda elimizde «Mıgrant» jedel-profılaktıkalyq is-sharasy ótkizildi, dep habarlaıdy Polisia.kz.
Іs-sharanyń negizgi maqsaty — Qazaqstan Respýblıkasynyń kóshi-qon zańnamasyn buzý derekterin anyqtaý, olardyń aldyn alý, sondaı-aq áýe jáne temirjol kóligi nysandarynda shetel azamattarynyń bolý qaǵıdalarynyń saqtaýyn baqylaý.
Ótkizilgen jedel-profılaktıkalyq is-shara aıasynda kóliktegi polıtsııa qyzmetkerleri elde bolý tártibin buzýdyń 101 deregin anyqtady. Onyń ishinde 88-i — TMD elderiniń azamattary, 13-i — alys shetel azamattary.
Sonymen qatar Qazaqstan Respýblıkasynyń kóshi-qon salasyndaǵy zańnamasyn buzǵany úshin ÁQBtK-niń 518-baby boıynsha sheteldikter men azamattyǵy joq adamdardy qabyldaǵan kezde zań buzýshylyqtarǵa jol bergen 31 Qazaqstan Respýblıkasynyń azamaty jaýapkershilikke tartyldy.
KPD Kóshi-qon qyzmeti basqarmasynyń bastyǵy Bolat Sháripbaevtyń aıtýynsha, jedel-profılaktıkalyq is-sharalardy ótkizý kóshi-qon salasyndaǵy quqyq buzýshylyqtardy tıimdi anyqtaýǵa jáne olardyń jolyn kesýge, sondaı-aq halyqtyń quqyqtyq tártibin arttyrýǵa múmkindik beredi.
Aıta keteıik, Túrkistanda eki kún ishinde kóshi-qon zańyn buzǵan 118 sheteldik elden shyǵaryldy. Al Almatyda kóshi-qon zańnamasyn buzǵan 76 sheteldik deportatsııalandy.
