Kólikte osy 3 zat bolmasa, aıyppul salynýy múmkin
ASTANA. KAZINFORM — Dári qobdıshasy, órt sóndirgish jáne apattyq toqtaý belgisi — ár kólikte bolýy tıis eń qajetti zattar. Olardyń biri bolmasa, qujattardy tekserý kezinde aıyppul salynýy múmkin, dep habarlaıdy Kazinform tilshisi.
Qazaqstannyń jol qozǵalysy erejesine sáıkes, jeńil avtomobıl medıtsınalyq dári qobdıshasymen, órt sóndirgishpen jáne apattyq toqtaý belgisimen nemese qyzyl tústi jypylyqtaıtyn shammen jabdyqtalýy tıis.
Bul rette dári qobdıshasyn júksalǵyshqa salyp qoıyp, birneshe jyl boıy teksermeý jetkiliksiz. Onyń ishindegi zattardy, dári-dármekter men medıtsınalyq buıymdardyń jaramdylyq merzimin únemi tekserip otyrǵan jón.
Órt sóndirgish te jaramdy bolýy jáne qajet bolǵan jaǵdaıda qoljetimdi jerde ornalasýy kerek.
Paıdalanýǵa tyıym salynǵan aqaýlar nemese jaǵdaılar bolǵan kezde kólik basqarǵany úshin ákimshilik jaýapkershilik qarastyrylǵan. QR ÁQBtK-niń 590-baby 5-bóligi boıynsha aıyppul 5 AEK, ıaǵnı 21 625 teńgeni quraıdy.
Eger osyǵan uqsas zań buzýshylyq jaýapkershilikke tartylǵannan keıin bir jyl ishinde qaıtalansa, aıyppul 20 AEK-ke, ıaǵnı 86 500 teńgege deıin ósýi múmkin.
Al qosalqy dóńgelek, domkrat, sorǵy jáne dóńgelek buraıtyn kilt jolda qajet bolýy múmkin bolǵanymen, atalǵan jol qozǵalysy erejesi boıynsha jeńil avtokóliktiń mindetti jabdyqtary tizimine kirmeıdi.
Sondyqtan jolǵa shyǵar aldynda júksalǵyshty birneshe mınýt tekserip alǵan jón: dári qobdıshasy, órt sóndirgish jáne apattyq toqtaý belgisi ornynda bolýy kerek.
Buǵan deıin habarlanǵandaı, Soltústik Qazaqstan oblysynda 21 myńnan astam turǵynnyń tólenbegen aıyppuly bar.
