Kólikte beldik taqpaı júrgenderdiń aıyppuly esepten shyǵarylady
ASTANA. KAZINFORM – Іshki ister mınıstriniń orynbasary Sanjar Ádilov ákimshilik raqymshylyq jasaý aıasynda qandaı aıyppuldar esepten shyǵarylatynyn aıtty.
Onyń aıtýynsha, mundaı quqyq buzý derekteriniń basym bóligi jol qaýipsizdigi salasyna qatysty.
– Bul turǵyda beldikti taqpaı júrgender, joldaǵy tańbalardy elemeý sııaqty jaǵdaılar qamtyldy. Al jyldamdyqty asyryp júrgenderdiń aıyppuly esepten shyǵarylmaıdy, - dedi S. Ádilov Senattyń jalpy otyrysynan keıin tilshiler suraǵyna jaýap bere otyryp.
Sonymen qatar, tynyshtyq pen abattandyrý erejelerin buzǵany úshin aıyppulǵa tartylǵandar ákimshilik raqymshylyqqa iligedi.
Budan buryn habarlaanǵandaı, búgin Senattyń jalpy otyrysynda «Qazaqstan Respýblıkasynyń jańa Konstıtýtsııasyn qabyldaýǵa baılanysty raqymshylyq jasaý týraly» Zań men ilespe qujat maquldandy.
Onyń aıasynda elde qylmystyq jáne ákimshilik raqymshylyq jarııalanbaq.
Munymen qosa, ákimshilik raqymshylyq aıasynda quqyq buzý derekteri úshin salynǵan ákimshilik aıyppul túrindegi ákimshilik jazadan kelesi adamdardy tolyq bosatý usynyldy:
- Qazaqstan Respýblıkasynyń azamattary sanalatyn jeke tulǵalardy;
- jeke kásipkerler qataryndaǵy kásipkerlik sýbektilerin;
- jeke notarıýstardy, jeke sot oryndaýshylaryn, advokattar men zań konsýltanttaryn.
Ákimshilik raqymshylyq jasaý sottar salǵan aıyppuldarǵa, sondaı-aq azamattar men memlekettiń qaýipsizdigine qater tóndiretin quqyq buzý derekterine salynǵan aıyppuldarǵa qoldanylmaıdy.
