Kólikti uzaq qyzdyrý: ishki ister organdary jappaı aıyppul salýdy maqsat etpeıdi

ASTANA. KAZINFORM — Avtokólik qozǵaltqyshyn uzaq qyzdyryp turǵandarǵa aıyppul salýǵa qatysty másele qoǵamda qyzý talqylanyp jatyr. Degenmen, bul norma qabyldanǵanyna biraz jyl bolǵan. Osy oraıda, Іshki ister mınıstrligi máselege qatysty túsinik berdi.

- Іshki ister mınıstrligi jappaı aıyppul (atalǵan norma boıynsha) salýdy kózdemeıdi. Quqyq buzý derekterine qatysty azamattardan shaǵym túskende ǵana sol boıynsha zańdy shara qabyldanady, - dep jaýap berdi Іshki ister mınıstrliginiń baspasóz qyzmeti Kazinform agenttigine bergen jaýabynda.

Vedomstvonyń málimdeýinshe, sharanyń negizi maqsaty – qoǵamdyq tártiptiń saqtalýy.

- Kólikti bes mınýttan artyq qyzdyrý degen - shartty uǵym. Eń birinshiden, adamdar «tynyshtyǵymyzdy buzdy, jarty saǵattan beri kóliginiń qozǵaltqyshyn daryldatyp mazamyzdy aldy» dep shaǵymdanýy múmkin. Sondaı jaǵdaıda tynyshtyqty buzǵany úshin belgilengen erejelerge sáıkes shara qoldanylady. Mundaǵy maqsat - ortaq qoǵamdyq tártipti saqtaý, halyqtyń tynyshtyǵyn qorǵaý, - dep túsindiredi mınıstrlikten.

Qoldanystaǵy Jol qozǵalysy qaǵıdasynyń 88-tarmaǵy 5-tarmaqshasyna sáıkes, turǵyn pýnktilerinde qozǵaltqyshy jumys istep turǵan mehanıkalyq kólik quraldarynyń turǵyndarǵa qolaısyzdyq týdyryp toqtap turýyna tyıym salynady. Osyndaı talap JJQ-nyń 17-bóliminiń 122-tarmaǵy 4-tarmaqshasynda da kórsetilgen.

- Bul - jańa norma emes. Ol Jol júrisi qaǵıdasynda 20 jyldan astam ýaqyttan beri bar. Eger kólik quraly toqtap turǵan kezde qozǵaltqyshy 5 mınýttan artyq jumys istep, turǵyndarǵa qolaısyzdyq týdyrsa, bul jaǵdaıda Qazaqstan Respýblıkasynyń Ákimshilik quqyq buzýshylyq týraly kodeksiniń 597-baby 1-bóliginde kózdelgen quqyq buzýshylyqtyń quramyna sáıkes qarastyrylady. Іshki ister organdary atalǵan quqyq buzýshylyq úshin azamattarǵa jappaı aıyppul salýdy maqsat etpeıdi. Kórsetilgen bap boıynsha ákimshilik quqyq buzýshylyq týraly is azamattardyń shaǵymdary túsken kezde ǵana, kýágerler quqyq buzýshylyq týraly fotosy men beınematerıaldaryn usynǵan jaǵdaıda ǵana qozǵalady, - dep atalyp ótken vedomstvo aqparatynda.

Eske salsaq, taıaýda Májilistiń jalpy otyrysynda depýtat Serik Erýbaev qatty aıazdy kúnderi avtokólikti jylytýǵa 5 mınýttan kóp ýaqyt ketetinin aıtty. Osy oraıda ol kóliktiń qozǵaltqyshyn uzaq qyzdyrǵany úshin aıyppul salý normasy qısynsyz ekenin atap ótti.

Aıta keteıik, osy norma aıasynda aıyppul 5 AEK somasynda qarastyrylǵan. Al osy talapty qaıtadan buzǵandarǵa 10 AEK aıyppul salynady.

Senator Marat Qojaev atalǵan tártip kezinde kórshiler men basqa da adamdarǵa zııan keltirmeý maqsatynda engizilgenin aıtty.