Kólikti tehnıkalyq tekserý salasynda zań buzý derekteri kóbeıdi - mınıstrlik

ASTANA. KAZINFORM – Jyl basynan beri avtokólikti tehnıkalyq tekserý qaǵıdalaryn oryndamaǵan operatorlarǵa 270 hattama toltyryldy. Bul týraly QR Kólik mınıstrliginen málim boldy.

«Qazirgi kezde tehnıkalyq qarap-tekserýdiń operatorlary jaǵynan zań buzý derekteri kóbeıgeni baıqalyp otyr. Máselen, 2023 jyly 12 aıda mehanıkalyq kólik quraldary men olardyń tirkemelerin mindetti tehnıkalyq qarap-tekserýden ótkizý kezeńdiligin bekitý týraly QR Investıtsııalar jáne damý mınıstriniń m.a. 2015 jylǵy 26 naýryzdaǵy № 329 buıryǵyn buzǵany úshin operatorlarǵa 394 ákimshilik hattama toltyrylyp, 8 mln teńge somasynda aıyppul óndirildi. Sonymen qatar, 2024 jyldyń 4 aıynda mindetti tehnıkalyq qarap-tekserýdi uıymdastyrý jáne júrgizý qaǵıdalaryn buzǵany úshin 270 ákimshilik hattama toltyrylyp, 7,8 mln teńge aıyppul óndirildi», - delingen Kólik mınıstrliginiń Kazinform agenttigine bergen jaýabynda.

Vedomstvo málimetinde bul turǵyda kólikti tehnıkalyq tekserýden ótkizetin operatorlar 10 - 50 AEK deńgeıindegi aıyppuldy tólep, odan ári zań buzýdy jalǵastyryp otyrǵany aıtylǵan.

«Osy sebepti Ákimshilik quqyq býzýshylyq týraly kodekste 616 bapty buzǵany úshin aıyppuldy 30 – 100 AEK deıin kóterý qarastyrylǵan», - dep atalyp ótken mınıstrlik aqparatynda.

Eske sala keteıik, mamyr aıynyń basynda kóligin ótirik tehnıkalyq tekserýden ótkizgenderge aıyppul 370 myń teńgege deıin ósýi múmkin ekeni habarlandy.

Qazir naryqta 950-qa jýyq operator kólikti tehnıkalyq tekserýden ótkizý qyzmetin kórsetip jatyr.