Kólikti tehnıkalyq tekserý salasynda ózgeris engizilmek
ASTANA. KAZINFORM – QR Kólik mınıstrligi kólikti tehnıkalyq tekserý salasyndaǵy ózgeristerge qatysty túsinik berdi.
«Kólik quraldarynyń jekelegen túrleriniń qozǵalysyn uıymdastyrý jáne jol qaýipsizdigin tsıfrlandyrý máseleleri boıynsha «Jol júrisi týraly» Zańyna ózgerister men tolyqtyrýlar engizý týraly» zań jobasy aıasynda tehnıkalyq baıqaý operatorlaryn ashýdy habarlamalyq baqylaýdan ruqsat berý baqylaýyna kóshý kózdelgen. Bul qujatty QR Parlamenti Májilisi qabyldady jáne Senattyń qaraýynda jatyr. Zańdy bıylǵy qyrkúıek aıynda bekitiledi dep josparlanǵan. Tehnıkalyq baıqaý operatorlaryna qatysty aıyppuldy 30-dan 100 AEK-ke deıin ulǵaıtý boıynsha jumys atqarylyp jatyr (369 200 teńge)», - delingen QR Kólik mınıstrliginiń Kazinform agenttigine bergen jaýabynda.
Vedomstvo aqparatyna qaraǵanda, mınıstrlik Tsıfrlyq damý mınıstrligimen jáne Saýda mınıstrligimen birlesip, tehnıkalyq baıqaý ortalyqtarynda paıdalanylatyn baqylaý-ólsheý jabdyqtaryna qatysty berilgen sertıfıkattardyń durystyǵy men merzimderin tekserý boıynsha tehnıkalyq baıqaýdyń biryńǵaı aqparattyq bazasyn (BBAJ) Tehnıkalyq retteý jáne metrologııa komıtetiniń bazasymen ıntegratsııalaý máselelerin pysyqtap jatyr.
Munymen qosa, keleshekte tehnıkalyq baıqaý merzimi ótken kólik quraldaryn anyqtaý úshin QR Іshki ister mınıstrligimen jáne «Sergek» kompanııasymen birge tehnıkalyq baıqaýdyń bar-joǵyn avtomattandyrylǵan júıemen tekserýdiń pılottyq jobasyn, sondaı-aq basqa da qadamdardy iske asyrý josparlanǵan.
«Atalǵan is-sharalardy iske asyrý osy saladaǵy kemshilikterdi boldyrmaýǵa múmkindik beredi. Bul óz kezeginde joldaǵy kólik qozǵalysy qaýipsizdiginiń jaı-kúıine oń áser etedi», - dep atalyp ótken Kólik mınıstrligi aqparatynda.
Buǵan deıin kólikti tehnıkalyq tekserý salasynda zań buzý derekteri kóbeıgeni habarlanǵan edi.
