Kólikti mas kúıinde basqarǵandar 7 jyl boıy júrgizýshi kýáligin alýǵa emtıhan tapsyrýǵa jiberilmeıdi
ASTANA. KAZINFORM – Kólikti mas kúıinde basqarǵan adamdar jeti jyl boıy kólik quraldaryn basqarý quqyǵyn alýǵa emtıhan tapsyrýǵa jiberilmeıdi. Bul týraly Senattyń jalpy otyrysynda jol qaýipsizdigin tsıfrlandyrý máseleleri arnalǵan zańdy birinshi oqylymda talqylaý kezinde málim boldy.
Senator Evgenıı Bolgerttiń aıtynsha, Ákimshilik quqyq buzýshylyq týraly kodekstiń 608-baby (júrgizýshiniń kólik quralyn alkogoldik, esirtkilik masań kúıde basqarýy) jáne 613-baby (kýálandyrýdan ótýden jaltarý) boıynsha ákimshilik jaýaptylyqqa tartylǵan adamdarǵa qatysty tıisinshe jeti nemese segiz jyl boıy kólik quraldaryn basqarý quqyǵyn alýǵa emtıhandar tapsyrýǵa jiberýge tyıym salý engiziledi.
Aıta keteıik, kodekstiń 608-babynda júrgizýshiniń kólik quralyn alkogoldik, esirtkilik jáne ýytqumarlyq masań kúıde basqarýy, sol sııaqty kólik quralyn alkogoldik, esirtkilik nemese ýytqumarlyq masań kúıdegi adamnyń basqarýyna berý – on bes táýlikke ákimshilik qamaqqa alýǵa jáne jeti jyl merzimge kólik quralyn basqarý quqyǵynan aıyrýǵa alyp keledi.
