Kólikke memlekettik týdy ilý: 4 polıtseı qyzmetten ketti

ASTANA.KAZINFORM – ІІM Memlekettik tý men jol tártibi máselesin túsindirdi. 

Áleýmettik jelilerde Qazaqstan Respýblıkasynyń Memlekettik týyn kólikterge ilý máselesine qatysty taqyryp keńinen talqylanyp jatyr.

Elimiz boıynsha polıtsııa qyzmetkerleri jol qozǵalysy erejelerin óreskel buzýdyń 82 deregin anyqtap, jolyn kesti. Atalǵan tulǵalar memlekettik týdy paıdalana otyryp, jol qozǵalysy erejelerin qasaqana buzǵan, avtokólikterdiń qozǵalysyna kedergi keltirip, ózderiniń jáne ózge de jol qozǵalysyna qatysýshylardyń qaýipsizdigine qater tóndirgen.

Mundaı jaǵdaılarda polıtsııa beıjaı qaraı almaıdy jáne zańǵa sáıkes tıisti sharalar qabyldaýǵa mindetti.

Sonymen qatar jol qozǵalysy erejelerin buzǵan jekelegen azamattar ózderin memlekettik týdy paıdalanǵany úshin jaýapkershilikke tartty dep málimdep otyr.

— Bul shyndyqqa sáıkes kelmeıdi. Atalǵan tulǵalar memlekettik týdy paıdalanǵany úshin emes, naqty jol qozǵalysy erejelerin buzǵany úshin zań aıasynda jaýapkershilikke tartyldy. Osyǵan baılanysty, jalǵan aqparat taratqany úshin de jaýapkershilik kózdelgenin eskertemiz, — delingen ІІM habarlamasynda.

Sonymen birge, júrgizilgen tekserý nátıjesinde Almaty jáne Shymkent qalalarynda jekelegen jaǵdaılarda polıtsııa qyzmetkerleri zańsyz, quqyqqa qaıshy áreketterge barǵany anyqtaldy. Mundaı áreketter múlde jol berilmeıdi.

Atalǵan faktiler boıynsha naqty sharalar qabyldandy. 

— 8 polıtsııa qyzmetkeri, onyń ishinde basshylyq quram ókilderi tártiptik jaýapkershilikke tartyldy (sógis, qatań sógis), taǵy 4 qyzmetker atqaryp otyrǵan laýazymdarynan bosatyldy, — delingen habarlamada.

Іshki ister mınıstrligi zańdylyq pen zań aldynda barshaǵa teńdik qaǵıdattaryn dáıekti túrde ustanady. Quqyq buzýshylyqtar — azamattar tarapynan bolsyn, polıtsııa qyzmetkerleri tarapynan bolsyn — árqaısysy zańǵa sáıkes tıisti quqyqtyq baǵa alady.

— Qazaqstan Respýblıkasynyń Memlekettik týy — Táýelsizdik pen egemendiktiń qasıetti nyshany, erekshe máni bar memlekettik rámiz. Іshki ister mınıstrligi azamattardy memlekettik rámizderge qurmetpen qarap, jol qozǵalysy erejelerin qatań saqtaýǵa shaqyrady, — delingen ІІM habarlamasynda.

Aıta ketelik avtokólikterge memlekettik týdy ilý boıynsha Mádenıet mınıstrligi málimdeme jasaǵan edi. Eske salsaq Táýelsizdik kúni kólikterdi zańsyz toqtatqan polıtseıler jaýapkershilikke tartylatyny týraly jazǵan edik.