Kólikke qosymsha janarmaı bagyn ornatqan 537 kólik anyqtaldy
ASTANA. KAZINFORM – Іshki ister mınıstrligi janar-jaǵarmaı materıaldarynyń el aýmaǵynan zańsyz shyǵarylýynyń jolyn kesý boıynsha jumysty jalǵastyryp jatyr.
48 avtokólik ótkizý pýnktinde polıtsııa qyzmetkerleriniń táýlik boıy kezekshiligi uıymdastyrylǵan. Qosymsha janarmaı baktarymen jabdyqtalǵan kólik quraldaryna erekshe nazar aýdarylyp otyr.
Jyl basynan beri jalpy syıymdylyǵy 150 tonnadan asatyn qosymsha baktardy zańsyz ornatýdyń 537 faktisiniń joly kesildi.
– Mysaly, 2 qazanda Jambyl oblysynda kórshiles memlekettiń azamaty júk kóligine ruqsatsyz kólemi 500 lıtr bolatyn qosymsha bak ornatqany anyqtaldy. Er adam ákimshilik jaýapkershilikke tartylyp, bak alynyp tastaldy. Janar-jaǵarmaı materıaldarynyń elden zańsyz shyǵarylýynyń jolyn kesý jumystary jalǵasýda, – delingen ІІM habarlamasynda.
Aıta keteıik, buǵan deıin jyl basynan beri zańsyz qosymsha otyn baktaryn paıdalanǵan 255 júrgizýshi jaýapqa tartylǵany habarlanǵan. Ol kezde memlekettik shekaradaǵy avtomobıl ótkizý beketteriniń mańynda polıtsııa qyzmetkerleri qosymsha otyn baktarymen zańsyz jabdyqtalǵan kólikterge baqylaýdy kúsheıtkeni aıtylǵan.
