Kólik júrgizý quqyǵynan aıyrý merzimi qysqartylýy múmkin be — ІІM jaýaby
ASTANA. KAZINFORM — Úkimet otyrysynan keıingi baspasóz máslıhatynda Іshki ister mınıstriniń orynbasary Igor Lepeha kólik júrgizý quqyǵynan aıyrý merzimin qysqartý múmkindigine qatysty saýalǵa jaýap berdi.
Onyń aıtýynsha, Іshki ister mınıstrligi mas kúıinde kólik júrgizgeni úshin júrgizýshi kýáliginen aıyrý merzimin qysqartý máselesin qarastyrmaıdy. Mundaı sheshimge mas kúıinde kólik júrgizý faktileriniń áli de kóp bolýy sebep.
— 2023 jyly mas kúıinde kólik júrgizgen 22 myń júrgizýshini toqtattyq. 2024 jyly bul kórsetkish 24 700-ge, al 2025 jyly 25 300-ge jetti. Bıyldyń ózinde 17 100 júrgizýshi anyqtaldy. Jyl sońyna deıin áli úsh aıdan astam ýaqyt bar, áli de ulǵaıýy múmkin, — dedi ol.
Sondaı-aq ol ótken jyly mas júrgizýshilerdiń qatysýymen 670 jol-kólik oqıǵasy bolyp, 56 adam qaza tapqanyn atap ótti.
— Biz nege sol júrgizýshiler jaıynda ǵana aıta beremiz? Mas júrgizýshiler qaǵyp ketken adamdardyń týystarynan surap kóreıik. Olar raqymshylyq jasaý, jazany qysqartý nemese jeńildetý týraly usynystarǵa qalaı qaraıdy? Qatań sharanyń ózi adamdardy toqtata almaıdy, báribir júredi. Eger sharany jeńildetsek, bul tsıfr arta túsedi. Ustanymymyz ózgermeıdi. Kólik júrgizý quqyǵynan aıyrý merzimin qysqartý máselesin kótermeımiz, — dedi ІІM orynbasary.
Aıta keteıik, jol erejesin óreskel buzatyndar júrgizýshi kýáliginen 1 jylǵa aıyrylýy múmkin.
