Kólik júrgizý quqyǵynan aıyrylǵandar taksıde qyzmet ete almaıdy — Úkimet
ASTANA. KAZINFORM — Qazaqstanda taksı júrgizýshilerin jumysqa qabyldaýǵa qoıylatyn talap kúsheıtiledi. Júrgizýshi kýáliginen aıyrylǵan nemese jol erejesin jıi buzatyn adamdardy taksı salasyna jumysqa qabyldaýǵa jol berilmeıdi. Bul týraly Úkimet otyrysynda Premer-mınıstr Oljas Bektenov málimdedi.
Úkimet basshysy jolaýshylar tasymaly salasynda qaýipsizdik máselesine erekshe nazar aýdarý qajet ekenin atap ótti.
— Birinshi kezekte Ákimshilik quqyq buzýshylyqtardyń biryńǵaı tizilimin jolaýshylar tasymalyn júzege asyratyn jeke kompanııalardyń platformalarymen ıntegratsııalaý qajet. Jumysqa qabyldaý kezinde júrgizýshilerdi irikteý máselesi erekshe nazarda bolýǵa tıis. Taksı agregatorlary jumysqa tek tájirıbeli jáne jaýapkershiligi joǵary adamdardy alýy kerek. Júrgizýshi kýáliginen aıyrylǵan nemese jol erejelerin jıi buzǵan adamdar taksı salasynda jumysqa qabyldanbaýǵa tıis, — dedi Oljas Bektenov.
Jolaýshylardy tasymaldaýǵa arnalǵan kóliktiń tehnıkalyq jaı-kúıin de eskerý qajettigi aıtyldy. Taksı júrgizýshileriniń belgilengen jumys ýaqytynan artyq jumys isteýine jol bermeý qajet.
— Kólik mınıstrligine «Atameken» palatasymen birlesip, jekemenshik taksı qyzmetin retteý boıynsha qosymsha sharalar qabyldaýdy, kórsetiletin qyzmetter sapasyn qamtamasyz etýdi jalǵastyrýdy tapsyramyn. Munyń bári normatıvtik qujattarda naqty rettelýge tıis. Іshki ister mınıstrligi zańsyz tasymaldaýshylardy anyqtaýǵa baǵyttalǵan is-sharalardy turaqty negizde júrgizsin, — dedi Úkimet basshysy.
Aıta keteıik, Qazaqstanda jańadan kólik júrgize bastaǵan azamattardy daıarlaý sapasyna talap kúsheıtiledi.
Buǵan deıin Kólik mınıstri eldegi jol apattarynyń basty sebebin ataǵan edi.
Sondaı-aq jalǵan tehbaıqaý ótkizgen ortalyqtar 3 jyl jumys isteı almaıdy.
