Kólik jolda buzylsa, kim kómektesedi? QazAvtoJol jańa servısti iske qosty
ASTANA. KAZINFORM — Respýblıkalyq trassalarda «QazAvtoJoldyń» tehnıkalyq kómek pıkaptary jumysyn bastady, dep habarlaıdy kompanııanyń baspasóz qyzmeti.
«QazAvtoJol» respýblıkalyq mańyzy bar avtomobıl joldarynda júrgizýshilerge tehnıkalyq kómek kórsetetin jańa servısti iske qosty.
— Pılottyq rejımde arnaıy qyzǵylt sary pıkaptar Astana — Arshaly jáne Astana — Temirtaý baǵyttarynda jumysyn bastady. Kómek shaqyrý úshin 1403 biryńǵaı baılanys ortalyǵyna habarlasý jetkilikti. Qyzmet tegin kórsetiledi, — delingen habarlamada.
Kólik jolda óship qaldy, dóńgelek jaryldy nemese jeli shyqty, súırep áketý qajet boldy ne basqa da kútpegen jaǵdaı týyndady delik. Endi júrgizýshi «QazAvtoJoldyń» baılanys ortalyǵyna qońyraý shalyp, óziniń ornalasqan jeri men týyndaǵan máseleni operatorǵa habarlaı alady. Ótinish qabyldanǵannan keıin oqıǵa ornyna tehnıkalyq qyzmet ekıpajy jiberiledi. Arnaıy pıkaptar jol boıynda alǵashqy tehnıkalyq kómek kórsetýge qajetti qural-saımandarmen jáne jabdyqtarmen qamtylǵan. Kólikter ashyq qyzǵylt sary túske boıalǵan jáne arnaıy jaryq sıgnaldarymen jabdyqtalǵan. Sondyqtan olar jol qozǵalysynyń basqa qatysýshylaryna alystan anyq kórinedi. Ekıpajdar dóńgelek zaqymdanǵan nemese jeli shyqqan jaǵdaıda, kólikte tehnıkalyq aqaý paıda bolǵanda, súırep áketý qajet bolǵanda jáne júrgizýshi ózdiginen qozǵalysyn jalǵastyra almaıtyn ózge de jaǵdaılarda kómek kórsete alady.
— Kóliktiń trassada amalsyz toqtap qalýy, ásirese joǵary jyldamdyqty ýchaskelerde, túngi ýaqytta nemese qolaısyz aýa raıynda barlyq jol qozǵalysyna qatysýshylar úshin qosymsha qaýip týdyrady. Sondyqtan toqtaǵan kóliktiń ornyn der kezinde belgileý, júrgizýshige qajetti kómek kórsetý jáne qajet bolǵan jaǵdaıda kólikti qaýipsiz jerge shyǵarý mańyzdy, — deıdi mamandar.
Pılottyq joba jańa qyzmetke degen suranysty, ekıpajdardyń áreket etý ýaqytyn jáne júrgizýshiler jıi kezdesetin máselelerdi anyqtaýǵa múmkindik beredi. Jınaqtalǵan tájirıbe respýblıkalyq avtojoldardaǵy tehnıkalyq kómek júıesin odan ári damytý kezinde eskeriledi.
Kómekti qalaı shaqyrýǵa bolady?
Respýblıkalyq trassada kólik buzylyp nemese basqa da kútpegen jaǵdaı týyndasa, 1403 qysqa nómirine habarlasyp, operatorǵa turǵan jerińizdi, qozǵalys baǵytyn jáne máseleniń sıpatyn aıtý qajet.
— Tehnıkalyq qyzmet kelgenge deıin múmkindiginshe kólikti joldyń júrý bóliginen qaýipsiz jerge shyǵaryp, avarııalyq jaryq sıgnalyn qosyp, qaýipsizdik sharalaryn saqtaý usynylady. «QazAvtoJoldyń» jańa servısiniń basty maqsaty — respýblıkalyq trassada qıyn jaǵdaıǵa tap bolǵan júrgizýshige jedel kómek kórsetý jáne jol qozǵalysynyń qaýipsizdigin qamtamasyz etý, — delingen habarlamada.
Osydan buryn QazAvtoJol aýyr júk kóligi júrgizýshilerine mańyzdy eskertý jasady.
