Kólik jáne júk tasymaly salasyndaǵy alaıaqtar ustaldy: 6 avtokólik ıelerine qaıtaryldy
ASTANA. KAZINFORM - Іshki ister mınıstrligi halyqaralyq jáne qalaaralyq tasymaldaý salasynda qymbat avtokólikter men túrli taýarlardy urlaýdy jolǵa qoıǵan alaıaqtarǵa tosqaýyl qoıý boıynsha keshendi sharalar qabyldap jatyr, dep habarlaıdy Polisia.kz.
ІІM krımınaldyq polıtsııa departamentiniń jedel qyzmetkerleri Almaty oblysynyń aýmaǵynda uıaly baılanys, messendjerler men saıttardy paıdalaný arqyly qylmystyq shemany jolǵa qoıǵan bes adamnan turatyn qylmystyq topty ustady.
Qaskóıler urlap áketken alty kólik ıelerine qaıtaryldy. Ustalǵandarǵa qatysty sot qamaýǵa alý sanktsııasyn shyǵardy. Olardyń qylmystyq áreketterin qujattandyrý boıynsha jedel-tergeý is-sharalary jalǵasýda.
ІІM alaıaqtardyń aldaý tásili týraly aıtty. Tapsyrys berýshilermen jáne júk kólikteriniń júrgizýshilerimen olardyń kólik pen taýar tasymaldaý týraly habarlandyrýlary boıynsha alaıaqtar habarlasyp, tasymaldaý qyzmetin usynady. Olar tapsyrys berýshilerge ózderin avtokólik júrgizýshisi retinde, al júrgizýshilerge tapsyrys berýshi retinde tanystyrady. Eki tarapty da aldap, kóndirip, odan ári qaraı zańsyz ótkizý maqsatynda urlanǵan taýardy artady.
Osyǵan baılanysty mınıstrlik azamattarǵa júkti jóneltý jáne qabyldaý barysynda barlyq qajetti qujattarmen muqııat tanysýdy usynady. Habarlandyrýda kórsetilgen júrgizýshiniń nómirin mindetti túrde tekserip, onymen tasymaldaý marshrýtyn talqylap, jetkizý mekenjaıyn anyqtap alý qajet.
