Kólik jáne logıstıka máselesi geosaıasattyń ajyramas bóligine aınaldy - Prezıdent

ASTANA. KAZINFORM – Elimiz úshin kólik-logıstıka salasynyń áleýetin arttyrý – strategııalyq mańyzy bar mindet. Bul týraly «Turkistan» gazetine suhbat bergen Memleket basshysy Qasym-Jomart  Toqaev aıtty.

- Elimiz úshin kólik-logıstıka salasynyń áleýetin arttyrý – strategııalyq mańyzy bar mindet. Teńizge tikeleı shyǵatyn joly bolmasa da, Qazaqstan Eýrazııa qurlyǵynyń kindik tusynda, ıaǵnı negizgi tranzıttik kúre joldar toǵysqan jerde ornalasqan. Bul – úlken artyqshylyq, biz ony el ıgiligine jarata bilýge tıispiz. Maqsat-múddemizge sáıkes Qazaqstandy Eýrazııanyń kólik aılaǵy (haby) retinde qalyptastyrý – bul salada atqarylatyn jumystyń basty baǵyty, - dedi Prezıdent.

Osy oraıda, Memleket basshysy jaqynda iske qosylǵan «Dostyq – Moıynty» jańa temirjol magıstraliniń mán-mańyzyn atap ótti.

- Bul joba osy jol arqyly Qytaı men Eýropa arasynda tasymaldanatyn júk kólemin bes ese arttyrýǵa múmkindik beredi. «Moıynty – Qyzyljar», «Baqty – Aıagóz», «Darbaza – Maqtaaral» temirjol jelilerin jańadan iske qosý josparymyzda tur. Jalpy, 2030 jylǵa deıin 5 myń shaqyrym temirjoldy salyp, jańǵyrtý jáne 11 myń shaqyrym temirjoldy jóndeý kózdelip otyr, - dedi Qasym-Jomart Toqaev.

Memleket basshysynyń aıtýynsha, elorda men batys aımaqtardyń arasyndaǵy qashyqtyqty 500-den astam shaqyrymǵa qysqartatyn «Ortalyq – Batys» kúre joly qurylysynyń strategııalyq mańyzy óte zor.

- Biz el shekarasynan tys jerdi de qamtıtyn keń aýqymdy kólik júıesin qura aldyq. Qazaqstan muhıt joldarynan tysqary tursa da, Sary teńiz ben Qara teńizdiń arasynda júk termınaldarynyń jelisin qalyptastyrdy. Elimizdiń aýmaǵy arqyly ótetin 12 halyqaralyq kólik dálizi, atap aıtqanda, 5 temir jol, 7 avtokólik dálizi bar. Qytaı men Eýropa arasynda qurlyqpen jetkiziletin júktiń shamamen 85 paıyzy osy joldarmen tasymaldanady. Árıne, munyń bári – tabysqa op-ońaı jete qoıamyz degen sóz emes. Bul saladaǵy báseke kúsheıip keledi. Sebebi kólik jáne logıstıka máselesi geosaıasattyń ajyramas bóligine aınaldy. Osy taqyryp joǵary deńgeıdegi kelissózderdiń kún tártibine birjola endi. Sondyqtan Qazaqstan úshin de onyń aıryqsha mańyzy bar, - dedi Qasym-Jomart Toqaev.

Prezıdent elimiz Qytaıdyń «Bir beldeý – bir jol» atty megajobasyn, «Soltústik – Ońtústik» dálizin jáne Transkaspıı kólik baǵytyn, ıaǵnı, «Orta dálizdi» damytýǵa belsene atsalysyp kele jatqanyn aıtty.

- «Reseı – Qazaqstan – Túrikmenstan – Iran» baǵytymen teńiz aılaqtaryna shyǵyp, júk tasymaldaýdyń bolashaǵy zor dep sanaımyz. «Orta dálizdiń» jumysyna Qytaıdyń qosylýyn quptaımyz. Jalpy, bul salanyń áleýeti óte joǵary. Munda tek ınfraqurylym týraly sóz bolyp otyrǵan joq. Ekonomıkanyń barlyq derlik sektory osy irgeli salaǵa kelip toǵysady. Sondyqtan Úkimettiń aldyna zamanaýı ınjenerlik jáne servıstik ınfraqurylymy bar kólik-logıstıka toraptaryn salý, teńiz porttaryn, áýejaılar men temirjol vokzaldaryn jańǵyrtyp jóndeý, sondaı-aq tıimdi tsıfrlyq ekojúıe qalyptastyrý mindeti qoıyldy, - dedi Memleket basshysy.

Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.