Kólik jáne qoıma salasyndaǵy kórsetkish qaı óńirlerde tómen ekeni belgili boldy
ASTANA. KAZINFORM — Búgin Úkimet otyrysynda Kólik vıtse-mınıstri Maqsat Qalıaqparov salanyń damý barysy jóninde málimdedi.
— Toǵyz aıda kólik jáne qoımalaý salasynyń naqty kólem ındeksi 107,2% boldy. Jalpy ónim 10%-ǵa ósip, 9,6 trln teńgege jetti. Salanyń negizgi úlesi qoımalaý jáne qosalqy kólik qyzmetterine, temirjol jáne avtomobıl arqyly júk tasymaldaý, sondaı-aq qubyr kóligine keledi, — dedi ol.
Sonymen birge, óńirlerdiń basym bóliginde oń dınamıka baıqalady. Eń joǵary kórsetkish — Almaty, Jetisý men Soltústik Qazaqstan oblystarynda. Sondaı-aq, Shymkent pen Astanada jaqsy nátıje tirkeldi. Al Batys Qazaqstan, Atyraý jáne Aqtóbe oblystarynda qoımalaý, qosalqy kólik qyzmetteri jáne qubyr kóligi boıynsha qyzmetter kólemi tómendedi.
Aıta keteıik, buǵan deıin Úkimet otyrysynda Ónerkásip vıtse-mınıstri elimizde buryn óndirilmegen jańa ónim túrleri shyǵaryla bastaǵanyn málimdegen edi.
