Kólik turaqta órtenip ketse, shyǵyndy kim óteıdi - zańger túsindirdi
ASTANA. KAZINFORM — Eger kólik turaqta órtenip ketse, onyń ıesi tótenshe jaǵdaılar qyzmetine habarlasyp qana qoımaı, keltirilgen shyǵynnyń ótemin alý úshin qajetti dálelder men qujattardy óz betinshe jınaýy kerek.
Aldymen ne isteý qajet jáne qandaı jaǵdaıda saqtandyrý tólemin alýǵa bolady – bul týraly zańger Arys Danaǵatovtan suraǵan edik.
6 qazanda Astana qalasyndaǵy turǵyn úı keshenderiniń biriniń avtoturaǵynda bes kólik órtendi. Aldyn ala málimet boıynsha, qatty jeldiń saldarynan órt bir kólikten ekinshisine jaıylǵan.
Osy oqıǵaǵa baılanysty zańger Arys Danaǵatovpen suhbattasqan edik. Ol kólik ıeleri keltirilgen shyǵynnyń ótemin alý úshin qandaı áreketter jasaýy kerektigin túsindirdi.
Polıtsııaǵa, TJM-ge, saqtandyrý kompanııasyna jáne baǵalaýshyǵa júginý qajet
Zańger Arys Danaǵatovtyń aıtýynsha, eń aldymen kólik ıeleri polıtsııaǵa aryz berip, ótinishtiń tirkelgenin rastaıtyn talon-habarlama alýy tıis. Sondaı-aq, Tótenshe jaǵdaılar mınıstrliginen órt týraly anyqtama suratyp, tilsiz jaýdyń tutaný sebebin anyqtaý úshin saraptama júrgizilip jatqan-jatpaǵanyn naqtylaǵan jón.
Odan bólek, saqtandyrý kompanııasyna oqıǵa týraly KASKO shartynyń talaptarynda kórsetilgen merzimde habarlaý qajet. Ádette, bul úshin birneshe kún beriledi. Eger kólik ıesi belgilengen merzimdi ótkizip alsa, saqtandyrý kompanııasy tólem jasaýdan bas tartýy múmkin.
Táýelsiz baǵalaýshyny shaqyrý da mańyzdy is. Ol kólikti jóndeýge ketetin shyǵyndy nemese jóndeý tıimsiz bolǵan jaǵdaıda onyń naryqtyq qunyn anyqtaýy tıis.
– Táýelsiz baǵalaý júrgizilgenge deıin kólikti jóndeýge nemese kádege jaratýǵa (ýtılızatsııa) bolmaıdy. Áıtpese, keıin keltirilgen shyǵynnyń mólsherin dáleldeý qıynǵa soǵady, – dep eskertti sarapshy.
Foto, vıdeo jáne beınebaqylaý kameralarynyń jazbalaryn jınaǵan jón
Kólikter evakýatsııalanyp, aýmaq tazartylǵanǵa deıin oqıǵadan keıingi barlyq mańyzdy jaıtty sýretke túsirip alǵan abzal.
Sondaı-aq, zańger beınebaqylaý kameralaryndaǵy jazbalardy múmkindiginshe tezirek suratýǵa keńes beredi.
– Kólikti, kórshiles mashınalardy jáne avtoturaqty evakýatsııalaý men tazalaý jumystary bastalǵanǵa deıin sýretke jáne vıdeoǵa túsirý kerek. Jalpy kórinisti, kólikterdiń memlekettik nómirlerin jáne zaqymdanǵan jerlerin túsirgen jón. Turǵyn úı kesheni men kórshiles ǵımarattardaǵy beınebaqylaý kameralarynyń jazbalaryn suratý qajet. Olar uzaq saqtalmaıdy, sondyqtan jazbalardy alý týraly ótinishti jazbasha túrde ári birden bergen durys, - dep túsindirdi Danaǵatov.
Qandaı qujattardy jınaý kerek
Sonymen qatar, kólik ıeleri mynadaı qujattardy jınaýy qajet:
· kóliktiń tehnıkalyq pasporty;
· júrgizýshi kýáligi;
· saqtandyrý polısi nemese KASKO sharty;
· avtoturaq ornyna qatysty qujattar;
· MÚB (Múlik ıeleriniń birlestigi) nemese PIK-pen (Páter ıeleriniń kooperatıvi) jasalǵan shart.
Sondaı-aq, zańgerdiń sózinshe, turǵyn úı keshenine qyzmet kórsetetin uıymǵa jazbasha ótinish berip, avtoturaqtyń órt qaýipsizdigi jaǵdaıyna qatysty túsiniktemeler men qujattardy suratý artyq etpeıdi.
Saqtandyrý órtten kelgen shyǵyndy óteı me
Arys Danaǵatov túsindirgendeı, saqtandyrý tólemin alý múmkindigi eń aldymen saqtandyrý túrine baılanysty. Eger kólik ıesiniń KASKO saqtandyrýy bolsa, órtten kelgen shyǵyn, ádette, saqtandyrý arqyly óteledi.
– Órt kóbine saqtandyrý jaǵdaılarynyń tiziminde bar. Alaıda bári sharttyń naqty talaptary men ondaǵy erekshelikterge baılanysty. Mysaly, órt kólikti paıdalaný erejelerin buzý nemese qasaqana áreket saldarynan shyqsa, saqtandyrýshy tólem jasaýdan bas tarta alady, - dedi zańger.
Sonymen birge, órtke kináli adam anyqtalmaǵan jaǵdaıda da KASKO boıynsha tólem alýǵa bolady.
– Kináli adam belgisiz bolǵan kezde de saqtandyrý tólemi jasalýy múmkin. Tólemdi júzege asyrǵannan keıin saqtandyrý kompanııasy shyǵyndy kináli adamnan óndirip alýǵa quqyly, - dep atap ótti sarapshy.
Al eger kólik ıesinde tek kólik quraldary ıeleriniń azamattyq-quqyqtyq jaýapkershiligin mindetti saqtandyrý (KQI AQJMS) polısi bolsa, ótemaqy alý áldeqaıda qıyn.
– Bul polıs kólik quralyn paıdalaný kezinde keltirilgen zııandy, eń aldymen jol-kólik oqıǵalaryna baılanysty zalaldy óteıdi. Al turaqta turǵan kóliktiń órtenýi, ádette, mundaı jaǵdaıǵa jatqyzylmaıdy. Eger saqtandyrý kompanııasy tólem jasaýdan bas tartsa, onyń sheshimine shaǵymdanýǵa bolady. Degenmen, saqtandyrý tólemin alasyz degen kepildik joq, - dep qorytyndylady maman.alpam
Aıta keteıik, buǵan deıin elordada 5 kóliktiń órtenýi saldarynan 1 adam jansaqtaý bólimine túskenin jazǵanbyz.
