Kólik shınasyn qaı ýaqytta aýystyrý kerek
ASTANA. KAZINFORM – QazAvtoJol sarapshylarynyń aıtýynsha, kóptegen júrgizýshiler shınanyń mańyzyn jete baǵalamaıdy. Alaıda ol – avtokóliktiń jolmen janasatyn jalǵyz bóligi. Shınanyń jaǵdaıy kóliktiń basqarylýyna, tejelý qashyqtyǵyna jáne janarmaı shyǵynyna tikeleı áser etedi. Eń bastysy – onyń sapasy júrgizýshi men jolaýshylardyń ómirine qatysty.
Rezeńkeniń eskirýi
Ýaqyt óte kele shına serpindiligin joǵaltyp, betinde mıkrojaryqtar paıda bolady, al ishki metall kordy álsireıdi. Syrt kózge bútin kóringenimen, jarylyp ketý qaýpi kúnnen kúnge arta beredi.
Qyzýdyń qaýiptiligi
Sýyqtan ystyqqa aýysqan kezde shınanyń ishki qysymy tabıǵı túrde ósedi. Jyldamdyq pen úıkelisten qosymsha qyzý paıda bolyp, qysym krıtıkalyq deńgeıge jetýi múmkin. Artyq úrlengen shına kólikti basqarýdy qıyndatýmen qatar jarylyp ketý qaýpin týdyrady.
Protektor men jańbyrdaǵy qaýip
Zań boıynsha protektordyń eń tómengi tereńdigi – 1,6 mm. Biraq mamandardyń aıtýynsha, 3 mm deńgeıinde-aq dymqyl jolda ustamdylyq kúrt tómendeıdi. Bul sý ústinde syrǵanaý áserin týǵyzyp, kólik sýdyń betinde syrǵyp, júrgizýshi baqylaýdy joǵaltýy múmkin.
«Gryja» jáne jasyryn zaqymdar
Bordıýrge qatty soǵylý nemese tereń shuńqyrǵa túsý shınanyń qańqasyn deformatsııalaıdy. Syrtta paıda bolǵan «gryja» – jasyryn jarylý qaýpin tóndiredi. Júkteme kezinde mundaı shına eskertýsiz jarylady.
Ár júrgizýshi este ustaýy tıis
-
Shınanyń qysymyn aıyna keminde bir ret tekserińiz;
-
Búıirlerin (jaryqtar, kesik jáne isinýler) qarap otyryńyz;
-
5 jyldan asqan shınalardy protektory tereń bolsa da aýystyryńyz;
-
Avtokólikti shamadan tys júktemeńiz jáne qatty soqqylardan saq bolyńyz.
Mamandardyń aıtýynsha, eń basty ereje – shınalarǵa únem jasamaý. Óıtkeni olardyń jaramdylyǵy – júrgizýshi men joldaǵy ózge de adamdardyń qaýipsizdiginiń kepili.
Aıta keteıik, buǵan deıin jaýynnan keıingi jol nege qaýipti ekenin jazǵanbyz.