Kólik sapasyz benzınnen buzylǵanda shyǵyndy kim óteıdi – Bektenov jaýap berdi
ASTANA. KAZINFORM – Premer-mınıstr Oljas Bektenov Quryltaı depýtattarynyń saýalyna oraı sapasyz benzın saldarynan kólik buzylǵanda shyǵyndy kim óteıtinin aıtty.
- Qazaqstan Respýblıkasynyń «Tutynýshylardyń quqyqtaryn qorǵaý týraly» Zańynyń 31-babyna sáıkes, satýshy taýar kemshilikteri saldarynan tutynýshynyń ómirine, densaýlyǵyna nemese múlkine keltirilgen zııandy óteýge, al taýardyń kemshiligi rastalǵan jaǵdaıda saraptama júrgizýge baılanysty shyǵyndardy da óteýge mindetti. Sonymen qatar Qazaqstan Respýblıkasy Azamattyq kodeksiniń 947 jáne 948-baptaryna sáıkes, taýardyń kemshilikteri saldarynan keltirilgen shyǵyn satýshynyń (daıyndaýshynyń) kinásine qaramastan ótelýge tıis jáne zardap shekken adamnyń tańdaýy boıynsha satýshy nemese daıyndaýshy tarapynan óteledi, - dedi Úkimet basshysy.
Premer-mınıstr osyǵan baılanysty sapasyz otyndy paıdalaný saldarynan avtomobılge zalal keltirilgen jaǵdaıda tutynýshy keltirilgen shyǵyndy óteý týraly talapty tikeleı satýshyǵa nemese daıyndaýshyǵa qoıýǵa quqyly ekendigine nazar aýdartady.
- Bul rette munaı ónimi sapasynyń nasharlaýy oryn alǵan jetkizý tizbeginiń naqty qatysýshysyn anyqtaý zańnamada kózdelgen rásimder aıasynda júzege asyrylady jáne bul tutynýshynyń keltirilgen shyǵyndy óteý týraly talap qoıý quqyǵyn shektemeıdi, - dedi Oljas Bektenov.
Buǵan deıin depýtat Ashat Rahymjanov janarmaı sapasy boıynsha ashyq memlekettik tizilim qurý qajettigin kótergen edi.
