Kólik salyǵy jeńildeı me: júrgizýshiler neni bilýi kerek
ASTANA. KAZINFORM — 2026 jylǵy 1 qańtardan bastap jańa Salyq kodeksine sáıkes kólik salyǵyn esepteý tártibi ózgeredi, dep habarlaıdy Memlekettik kirister komıtetiniń baspasóz qyzmeti.
Kólikti paıdalaný merzimi eskeriledi
Jeńil avtokólikter boıynsha kólik salyǵyn esepteý kezinde kóliktiń paıdalaný merzimi eskeriletin bolady. Eger kóliktiń paıdalanylǵanyna 10 jyldan 20 jylǵa deıin bolsa, salyq 0,7 túzetý koeffıtsıentin qoldaný arqyly esepteledi. Al 20 jyldan asqan avtokólikter úshin 0,5 koeffıtsıenti qoldanylady. Kólik salyǵy jyl qorytyndysy boıynsha tólenetindikten, bul koeffıtsıentterdi eskere otyryp eseptelgen salyq somasy 2026 jyl úshin 2027 jyly tólenedi.
Úlken qozǵaltqyshy bar kólikterge qatysty talap alyndy
Qozǵaltqysh kólemi 3000 sm³-tan asatyn jáne 2013 jyldan 1 jeltoqsannan keıin Qazaqstanda shyǵarylǵan nemese elge ákelingen jeńil kólikterge arnalǵan arnaıy joǵary salyq mólsherlemeleri endi qoldanylmaıdy.
Fermerlerge qosymsha jeńildik beriledi
Sharýa jáne fermer qojalyqtary bir júk platformasy bar, júrgizýshi kabınasy bólek pıkap avtokóligi úshin kólik salyǵyn tólemeıdi.
Kóliktiń túrine qaraı bólý joıylady
Pıkap, djıp, lımýzın, fýrgon sııaqty ataýlarǵa qarap salyq salý toqtatylady. Endi kólik sanaty tirkeý kýáliginde kórsetilgen júrgizýshi kýáliginiń sanatyna (A, B, C, D) qaraı anyqtalady.
Salyq tapsyrý jeńildeıdi
2026 jyldan bastap kólik salyǵy boıynsha toqsan saıyn esep tapsyrýdyń qajeti joq.
Salyq tóleýshi jylyna bir ret deklaratsııa tapsyryp, kólik salyǵyn jyl sońynda bir ret tóleıdi.
Eske salsaq, 2026 jyldyń 1 qańtarynan bastap elimizde jańa Salyq kodeksi kúshine endi. Qujat salyq salý tásilin túbegeıli ózgertedi. Tolyǵyraq Kazinform tilshisiniń materıalynan oqı alasyz.