Kólik salyǵy: Pavlodar turǵyndarynyń bereshegi 700 mln teńgeden asyp ketti

PAVLODAR. KAZINFORM - Qazir Ertis-Baıan óńirinde 140 myńnan astam avtokólik ıesi bar. Olardyń menshiginde 200 myńnan astam kólik tirkelgen.

Óńirlik memlekettik kirister departamentinen habarlanǵandaı, qazirgi ýaqytta 10 609 pavlodarlyq avtokólik salyǵyn ýaqytyly tólemeı otyr.

- 700 mln teńgeden astam somaǵa kólik quraldaryna salynatyn salyq boıynsha bereshegi bar. Kólik quraldaryna salynatyn salyq Salyq kodeksiniń 493-babyna sáıkes derbes esepteledi. Muny QR QM Memlekettik kirister komıtetiniń kgd.gov.kz portalynda ornalastyrylǵan «Kólik salyǵyn esepteý» elektrondyq servısin paıdalaný arqyly nemese «E-Salyq Azamat» mobıldi qosymshasynyń (AppStore jáne PlayMarket-ten júkteý) «Kalkýlıatorlar» servısinde jasaýǵa bolady, - dep málimdedi departamentten.

Salyq mólsherlemesi aılyq eseptik kórsetkish (AEK) mólsherine jáne kólik qozǵaltqyshynyń kólemine baılanysty esepteledi. Sáıkesinshe, jyl saıyn salyq somasy AEK mólsheriniń ulǵaıýymen birge artady. Salyqty esepteý úshin tıisti qarjy jylynyń 1 qańtaryna deıingi AEK qoldanylady (3692 teńge). Salyqty ýaqytyly tólemegen adamdarǵa bıylǵy 2 sáýirden bastap salyq bereshegi týraly habarlamalar jiberiletin bolady. Sondaı-aq merzimi ótken árbir kún úshin ósimpul esepteledi.

Eske sala keteıik, Qyrǵyzstan kólik kýzovyn ákelýge tyıym salýdy usyndy.