Kólik salasyndaǵy quqyq buzýshylyqtar boıynsha ákimshilik is júrgizý avtomattandyrylady
ASTANA. KAZINFORM — Kólik mınıstrliginiń jergilikti atqarýshy organdarmen birlesip úılestirýimen ótken jyldan bastap joldarda júk avtokólik quraldarynyń salmaq boıynsha parametrlerin ólsheıtin avtomattandyrylǵan stantsııalardy ornatý boıynsha jumys júrgizilip jatyr.
Osylaısha joldardaǵy kóliktik baqylaý 157 myń shaqyrymda 43 jyljymaly bekettiń kúshimen júzege asyrylady. ıAǵnı, 1 beketke shaqqanda 5 myń shaqyrymǵa deıin keledi. Sondyqtan barlyq joldy tek jyljymaly beketterdiń kúshimen tolyq qamtý múmkin emes.
Osyǵan baılanysty Kólik mınıstrligi tarapynan tarazylaýdyń tsıfrlyq formatyna tolyq kóshý jóninde sharalar qabyldanyp jatyr. Bul maqsatta 2022 jylǵy jeltoqsanda avtomattandyrylǵan ólsheý stantsııalarynyń jumys isteý tártibin aıqyndaıtyn zań qabyldandy. Atalǵan zańǵa sáıkes ólsheý stantsııalaryn jergilikti avtojoldarda — ákimdikter, al respýblıkalyq avtojoldarda «QazAvtoJol» AQ ornatady.
«Budan basqa, zańda júk kótergishtigi 12 tonnadan asatyn kólik quraldarynyń avtomattandyrylǵan ólsheý stantsııalary arqyly mindetti túrde ótýi kózdelgen.
Kólik quraldaryn ólsheý onyń qozǵalysy kezinde júzege asyrylady. Zań buzýshylyqtardy onlaın avtomatty túrde tirkeý, aınalma joldardy beınetirkeý, sondaı-aq aıyppul adamnyń qatysýynsyz «Sergek» arqyly resimdeletin bolady», — dep jazdy vedomstvodan.
Tájirıbe kórsetip otyrǵandaı, quqyq buzýshylardy ınspektsııaǵa shaqyra otyryp, tirkelgen buzýshylyqtar boıynsha aıyppuldardy resimdeý ózin tıimsiz etip kórsetip otyr, oǵan qosa sheshim qabyldaý kezinde adamı faktor oryn alady.
Osyǵan baılanysty búgingi tańda Kólik derekter qorynyń aqparattyq-taldamalyq júıesin Bas prokýratýraǵa qarasty Quqyqtyq statıstıka jáne arnaıy esepke alý komıtetiniń «Ákimshilik óndiristerdiń biryńǵaı tizilimi» protsessıngtik ortalyǵymen ıntegratsııalaý jolymen kólik salasyndaǵy quqyq buzýshylyqtar boıynsha ákimshilik is júrgizý protsesin avtomattandyrýdy iske asyrý boıynsha jumystar bastalyp ketti.
Budan basqa, atalǵan zańdy iske asyrý sheńberinde Kólik mınıstrligine qarasty Avtomobıl kóligi jáne kóliktik baqylaý komıtetiniń bastamasy boıynsha Ákimshilik polıtsııa, Avtomobıl joldary komıtetimen jáne Astana qalasynyń ákimdigimen birlesken Jol kartasy ázirlendi.
«Jol kartasy aıasynda ótken jyldyń qazan aıynan bastap Astana qalasynyń ákimdigi avtokólik quraldarynyń qalaǵa kelýiniń negizgi alty núktesinde avtomattandyrylǵan ólsheý stantsııalaryn ornatý boıynsha jumysty bastady.
Osylaısha, qalaǵa kiretin barlyq júk kóligi ólshenetin bolady. Bul shara elordada júk kólikterin baqylaýdy júzege asyrý barysynda adamı faktordy barynsha joıýǵa yqpaldasady dep kútilýde», — delingen mınıstrlik aqparatynda.
Osy rette óńirlik jáne Astana, Almaty, Shymkent qalalarynyń ákimdikteri 2024 jyldyń sońyna deıin qalaǵa avtokólik quraldarynyń kelýiniń negizgi núktelerinde 150 avtomattandyrylǵan ólsheý stantsııalaryn jáne «QazAvtoJol» AQ respýblıkalyq joldarda 70 ólsheý stantsııalaryn ornatý josparlap otyr.
Joǵaryda atalǵan sharalar aýyr jáne iri kólemdi kólik quraldarynyń jol júrýin baqylaý máselelerin sheshýge jáne kóliktik baqylaý kezinde oryn alatyn sybaılas jemqorlyq táýekelderin barynsha azaıtýǵa baǵyttalyp otyr.
