Kólik salasynda kórsetilgen qyzmet kólemi 2,9 trln teńgege jetti
ASTANA. KAZINFORM — 2026 jylǵy qańtar–naýryz aılarynyń qorytyndysy boıynsha Qazaqstannyń kólik salasy negizgi kórsetkishter boıynsha turaqty ósim kórsetip otyr. Naqty kólem ındeksi 112,8% shamasynda, dep habarlaıdy Kólik mınıstrliginiń baspasóz qyzmeti.
Kórsetilgen qyzmetter kólemi 2,9 trln teńgege jetti, bul 2025 jyldyń sáıkes kezeńindegi kórsetkishten (2,4 trln teńge) asyp túsedi.
Tasymaldanǵan júktiń jalpy kólemi ótken jyldyń qańtar–naýryz aılarymen salystyrǵanda 8%-ǵa artyp, 239,8 mln tonnaǵa ulǵaıdy (222 mln tonna).
Jolaýshylar tasymalynyń kólemi 9,3%-ǵa ósip, 483,7 mln adamǵa jetti. Al 2025 jyldyń osy kezeńinde bul kórsetkish 442,5 mln jolaýshyny quraǵan bolatyn.
Jyl sońyna deıin oń dınamıkany saqtaý iri ınfraqurylymdyq jobalardy iske asyrý esebinen qamtamasyz etiledi. Atap aıtqanda, jumystyń barlyq túrimen 11 myń shaqyrym avtomobıl jolyn qamtý josparlanǵan.
Temirjol salasynda «Darbaza — Maqtaaral» jáne «Moıynty — Qyzyljar» jańa jelileriniń qurylysyn aıaqtaý josparlanǵan. Bul jeliniń ótkizý qabiletin arttyryp, eldiń tranzıttik áleýetin keńeıtýge múmkindik beredi.
Azamattyq avıatsııa salasynda bıyl Katonqaraǵaı, Zaısan jáne Kendirli týrıstik aımaqtarynda úsh jańa áýejaıdyń qurylysyn aıaqtaý kózdelgen.
Kólik parkin jańartýǵa erekshe kóńil bólinip otyr. 2026 jyly 9 áýe kemesin satyp alý josparlanǵan. Jyl basynan beri 3 ushaq alyndy: Air Astana — 1, SCAT Airlines — 2.
Sonymen qatar, 1800 birlik jyljymaly quramdy jańartý qarastyrylǵan, onyń ishinde: 236 lokomotıv, 1373 júk vagony jáne 191 jolaýshylar vagony bar.
— Atalǵan sharalardy iske asyrý kólik salasynyń turaqty ósýin qamtamasyz etýge jáne 2026 jyldyń qorytyndysy boıynsha naqty kólem ındeksiniń josparly 110% deńgeıine qol jetkizýge múmkindik beredi, — delingen mınıstrlik habarlamasynda.
Budan buryn Oljas Bektenov temirjol vokzaldaryn jańǵyrtý jumystary baıaý júrip jatqanyn synady.
