Kólik salasynda derekterdi óńdeý ýaqyty qanshalyqty qysqardy
ASTANA. KAZINFORM — Temirjol salasynda jasandy ıntellektige negizdelgen 10-ǵa jýyq joba iske asyrylyp jatyr. Bul týraly Úkimet otyrysynda Kólik mınıstri Nurlan Saýranbaev aıtty.
— Kólik mınıstrligi kólik-logıstıka salasyna jasandy ıntellektini engizip jatyr. Basty maqsat — protsesterdi jeńildetý, shyǵyndardy azaıtý jáne tranzıttik áleýetti arttyrý. Smart Cargo — memlekettik organdar men bıznes ókilderin biriktiretin tsıfrlyq platforma. Júk týraly barlyq málimet QR-kod arqyly qoljetimdi. Jasandy ıntellekt qujattardy avtomatty túrde tekseredi, marshrýttardy quryp, qozǵalysty baqylaıdy jáne qajetti ruqsattardy anyqtaıdy.
Nátıjesinde, shekaradan ótý ýaqyty 4 saǵattan 30 mınýtqa (8 ese azaıtady) deıin qysqarady. Temirjol salasynda jasandy ıntellektige negizdelgen 10-ǵa jýyq joba iske asyrylyp jatyr. Sonyń negizgisi — KinetiX dıagnostıkalaý júıesi. Buryn dıagnostıka qolmen júrgizilip, 2 saǵatqa deıin ýaqyt alatyn jáne adam faktoryna táýeldi bolatyn. Qazir júıe 9 negizgi parametr boıynsha avtomatty túrde beıneanalıtıka arqyly vagondardyń defekterin anyqtaıdy, aldyn ala boljaıdy jáne naqty ýaqyt rejıminde tekseredi. Nátıjesinde dıagnostıka 8 mınýtqa deıin qysqardy, — dedi Nurlan Saýranbaev.
Sonymen qatar ol avtomobıl kóligi salasynda júk tasymalyn ıntellektýaldy baqylaý júıesi engizilip jatqanyn aıtty. Jasandy ıntellekt kólik marshrýttaryn anyqtaıdy, salmaq ólsheý stantsııalarymen derekterdi salystyrady, ereje buzý derekterin anyqtaıdy jáne avtomatty túrde sıgnal beredi. Bul salmaq baqylaýyn aınalyp ótý jaǵdaılaryn joıady jáne joldardyń tozýyn azaıtady.
— Mınıstrliktiń ishki protsesterine transformatsııa júrgizýge erekshe nazar aýdarylǵan. Bul jumys Jasandy ıntellekt mınıstrligimen birlesip júrgizilip jatyr. Qazir kóp ýaqyt qujattardy qolmen óńdeýge ketedi jáne 30 kúnge deıin ýaqyt alady. Jasandy ıntellekt engizilgennen keıin bul merzim 3 kúnge deıin qysqarady, — dedi mınıstr.
Budan bólek, biryńǵaı ıntellektýaldy kólik júıesi — e-Kólik qalyptasyp jatyr. Platforma QazTech bazasynda qurylady jáne barlyq kólik túrlerin biriktiredi. Bul derekterdi jınaýǵa, óńdeýge, kólik aǵyndaryn boljaýǵa jáne sheshimderdi avtomatty túrde qabyldaýǵa múmkindik beredi.
Budan buryn habarlanǵandaı, elde Tsıfrlyq transformatsııa kartalary engizilip jatyr.
