Kólik salasy qyzmetkerlerine memlekettik nagradalar tabystaldy
ASTANA. KAZINFORM — Kólik qyzmetkerleri kúni qarsańynda Premer-mınıstr Oljas Bektenov sala mamandary men ardagerlerin Memleket basshysy Qasym-Jomart Toqaevtyń atynan kásibı merekelerimen quttyqtap, memlekettik nagradalar tabys etti, dep habarlaıdy Úkimettiń baspasóz qyzmeti.
Premer-mınıstr óz sózinde kólik-logıstıka sektorynyń el ekonomıkasyn damytýdaǵy basty rólin atap ótti.
— Memleket basshysy Qasym-Jomart Kemeluly Toqaev bizdiń aldymyzǵa kólik sektorynyń áleýetin arttyryp, Qazaqstandy senimdi tranzıttik hab retinde damytý mindetin qoıdy. Bul oraıda, jolaýshylar men júk tasymalyn qaýipsiz ári úzdiksiz qamtamasyz etip otyrǵan kólik qyzmetkerleriniń qajyrly eńbegi qashanda mańyzdy. Otandyq kólik salasy bıylǵy 6 aıdyń qorytyndysy boıynsha 22,7% deńgeıinde qarqyndy ósim kórsetti. Munyń barlyǵynda ózderińiz sııaqty sala mamandary men ardagerleriniń mańdaı teri, adal eńbegi jatyr, — dep atap ótti Oljas Bektenov.
Prezıdenttiń tapsyrmasy boıynsha júzege asyp jatqan ınfraqurylymdy jańǵyrtý, tsıfrlandyrý jáne Qazaqstannyń tranzıttik áleýetin arttyrý boıynsha aýqymdy sharalar atap ótildi. Qazirgi ýaqytta 13 myń shaqyrym avtojol jóndelýde, 1,3 myń shaqyrymnan astam jańa temirjol jelileri, zamanaýı logıstıkalyq habtar men áýejaılar salynýda. 2029 jylǵa qaraı el aýmaǵy arqyly ótetin tranzıttik júkterdiń kólemin 100 mln tonnaǵa deıin arttyrý josparlanyp otyr.
Transkaspıı halyqaralyq kólik dálizin qosa alǵanda, mýltımodaldy marshrýttardy damytýǵa erekshe nazar aýdarylýda — bul jobany júzege asyrý úshin Aqtaý jáne Quryq porttary jańǵyrtylyp jatyr.
Sondaı-aq Prezıdenttiń tapsyrmasy boıynsha bıyl naýryz aıynda Ulttyq quryltaı otyrysynda Astana — Arqalyq — Torǵaı — Yrǵyz baǵyty boıynsha THKB-ǵa shyǵatyn «Ortalyq — Batys» magıstraliniń qurylysy bastaldy, bul eldiń ortalyq jáne batys óńirleri arasyndaǵy marshrýtty 560 shaqyrymǵa qysqartýǵa múmkindik beredi. Sonymen qatar avıatsııa salasynyń damýy da atap ótildi. Elimizdiń túgeldeı derlik áýejaıynda «áýe erkindiginiń» besinshi dárejesi bar. Týrızmdi damytý maqsatynda Katonqaraǵaı, Zaısan jáne Kendirli kýrorttyq aımaqtarynda jańa áýejaılar salynýda. Almaty, Qyzylorda jáne Shymkent qalalarynda jańa jolaýshylar termınaldary ashyldy. Arqalyq áýejaıyn qalpyna keltirý jumystary júrgizilip jatyr.
Premer-mınıstr Qazaqstannyń kólik salasy tutastaı alǵanda jańa tsıfrlyq sheshimderdi, onyń ishinde basqarýdyń avtomattandyrylǵan júıelerin, tsıfrlyq dıspetcherlendirýdi engizý nátıjesinde barǵan saıyn tehnologııalyq jáne klıentke baǵdarlanǵan sıpatqa ıe bop kele jatqanan atap ótti. Oljas Bektenov Prezıdent atynan eńbegimen kózge túsken qyzmetkerlerge kólik salasyn damytýǵa qosqan úlesi úshin memlekettik nagradalar men qurmetti ataqtar tabys etti.
— Bıyl Jumysshy mamandyqtary jyly aıasynda memlekettik marapattar júıesine alǵash ret «Qazaqstannyń kólik salasynyń eńbek sińirgen qaıratkeri» degen qurmetti ataǵy engizildi. Muny Memleket basshysynyń jáne búkil Qazaq eliniń ózderińiz sııaqty naǵyz eńbek adamdaryna degen shynaıy qurmeti dep qabyldańyzdar. Búgin elimizdiń basqa da óńirlerinde kólik salasynyń óndiris ozattary men eńbek ardagerlerin ulyqtaý rásimi ótip jatyr. Respýblıka boıynsha 200-ge jýyq adamǵa memlekettik nagradalar men qurmetti ataqtar tabystalady. Bul — el ıgiligi jolynda eseli eńbek etip jatqan otandyq kólik salasy qyzmetkerlerin qoldaýdyń aıqyn kórinisi, — dep atap ótti Oljas Bektenov.
Marapattalǵandar atynan Qanat Shaımın men Ánýarbek Shulǵaýov sóz sóıledi. Kólik salasynyń qyzmetkerleri Prezıdentke rızashylyqtaryn bildirip, olardyń eńbegine berilgen joǵary baǵa Qazaqstan ıgiligi úshin ári qaraı da adal jumys isteýge yntalandyratynyn atap ótti.
— Memleket basshysyna bizdiń eńbegimizdi moıyndaǵany jáne qurmet kórsetkeni úshin shyn júrekten alǵys aıtamyz. El ıgiligi úshin qajymaı eńbek etý — bizdiń azamattyq boryshymyz. Bul marapat — biz úshin úlken qýanysh. Odan ári de adal qyzmet etýge jańasha jiger men shabyt beredi. Eńbegimiz halyq ıgiligine jarasyn, — dedi «Qazaqstan temir joly» UK» AQ «Býrabaı kýrorty rels dánekerleý kásiporny» fılıalynyń dırektory Ánýarbek Shulǵaýov.
Osyǵan deıin Prezıdent elimizdiń kólik salasyn damytýǵa, qatynas joldarynyń ınfraqurylymyn qalyptastyrýǵa jáne jańǵyrtýǵa qosqan eleýli úlesi úshin bir top azamatty memlekettik nagradamen marapattaǵanyn jazǵanbyz.