Kólik salasy astyqtyń jańa ónimin tasymaldaýǵa daıyn - Jánibek Taıjanov

ASTANA. KAZINFORM – Kólik salasy astyqtyń jańa ónimin tasymaldaýǵa tolyǵymen daıyn. Bul týraly Májilistiń Agrarlyq máseleler komıtetinde astyqty tasymaldaýdyń ózekti máselelerine arnalǵan otyrysta Kólik vıtse-mınıstri Jánibek Taıjanov aıtty.

- Qolda bar jyljymaly quram astyq júgin tasymaldaýǵa jetkilikti. Máselen, astyq tasymaldaıtyn vagondar sany 16 300 birlikke jetti. Ótken jyly 15 100 bolǵan edi. Al un tasymaldaýǵa arnalǵan jabyq vagondar sany 16 500 birlikke jetti. Ulttyq operatorda 1 700 lokomatıv bar. Jalpy, jyljymaly quram parki astyq júgin tasymaldaýdy tolyqtaı qamtamasyz etedi. Buǵan qosa, memleketaralyq pýnktter astyq tasymaldaýǵa tolyq daıyn, - dedi vıtse-mınıstr.

Onyń aıtýynsha, ol úshin atalǵan pýnktterdiń poıyzdardy ótkizý múmkindigi keńeıtildi. Máselen, Ózbekstan men Ortalyq Azııa baǵytynda bir táýlikte 42 poıyz, Qytaı baǵytynda 43 poıyz, al Reseı baǵytynda 85 poıyz óte alady.

- Osylaısha, barlyq eksporttyq baǵytta rezervter bar. Túıispe pýnktterdiń múmkindigi irkilissiz tasymaldy qamtamasyz etedi. Kólik salasy astyqtyń jańa ónimin tasymaldaýǵa tolyǵymen daıyn jáne júktelgen josparly kórsetkishterdi oryndaý úshin shtattyq rejımde jumys istep tur. Kólik mınıstrliginde múddeli barlyq taraptardyń qatysýymen astyq júgin tasymaldaý jónindegi jedel shtab jumys isteıdi. Shtab jumysy aıasynda apta saıyn ózekti máseleler qaralyp, astyqty irkilissiz tasymaldaýdy qamtamasyz etýge jáne júktelgen mindetti ýaqytyly iske asyrýǵa baǵyttalǵan jedel sharalar qabyldanady, - dedi Jánibek Taıjanov.

Aıta keteıik, elimizde 25,9 mln tonna astyq bastyryldy.