Kólik polıtseıleri memleketaralyq izdeýde júrgen 28 qylmyskerdi ustady
ASTANA. KAZINFORM — 2025 jyly jedel-izdestirý is-sharalary barysynda kóliktegi polıtsııa departamentiniń qyzmetkerleri memleketaralyq izdeýde júrgen 263 qylmyskerdi anyqtaǵan, dep habarlaıdy QR ІІM baspasóz qyzmeti.
Olardyń 97-si alys ta, jaqyn shetelderdiń azamattary. Bul týraly Kóliktegi PD krımınaldyq polıtsııa basqarmasynyń bastyǵy Erlan Álimov habarlady.
Sondaı-aq ol osy jyldyń basynan beri 28 qylmysker ustalǵanyn aıtty. Olardyń 11-i ýaqytsha ustaý ızolıatoryna qamalsa, 17-si izdestirý bastamashylaryna berilgen. Memleketaralyq izdeýde júrgenderdiń basym bóligi aýyr jáne asa aýyr qylmys jasaǵandar.
Qazir ustalǵandardyń barlyǵyna qatysty qajetti protsessýaldyq is-sharalar júrgizilip, olardy zańnamada kózdelgen tártipte izdestirýdi bastaǵan organdarǵa berý máselesi qarastyrylyp jatyr.
— Máselen, osy jyldyń naýryz aıynda Almaty qalasynyń áýejaıynda kóliktegi polıtsııa basqarmasynyń qyzmetkerleri Baký qalasynan ushyp kelgen reısten kisi óltirgeni úshin memleketaralyq izdeýde júrgen sheteldikti anyqtap, ustady. Kúdikti ózin qarapaıym jolaýshy retinde jasyrýǵa tyrysqanymen, baqylaý aımaǵynan shyǵyp úlgermedi, ıaǵnı onyń áreketteriniń jedel joly kesildi. Quqyq qorǵaý organdarynyń naqty ári kásibı áreketteriniń arqasynda ol dereý qamaýǵa alyndy. Oǵan izdestirý jarııalaǵan quzyretti organǵa tıisti habar berildi, — dedi E. Álimov.
Kólik polıtsııasy qylmyskerlerdi jasyrynǵan ýaqyty men ornyna qaramastan anyqtaýdy jáne ustaýdy qamtamasyz ete otyryp, jazanyń bultartpastyǵy prıntsıpin dáıekti túrde júzege asyrady.
— Zańnan jaltarýǵa baǵyttalǵan kez kelgen áreketke tosqaýyl qoıylyp, kináli tulǵalar zańǵa sáıkes jaýapkershilikke tartylady, — dep túıindedi sózin E.Álimov.
Budan buryn Kóliktegi polıtsııa departamenti «Quqyqtyq tártip» is-sharasynyń qorytyndysyn shyǵarǵanyn jazdyq.
