Kólik polıtseıi Qulsaryda bolǵan órtte turǵyndardy evakýatsııalaýda batyldyq tanytty
ATYRAÝ. KAZINFORM – Búgin saǵat 9:35 shamasynda Atyraý oblysy Qulsary stantsııasyndaǵy jelilik polıtsııa bólimshesiniń qatardaǵy polıtseıi Álıhan Ahmetov vokzal aýmaǵyn patrýldeý barysynda jubaıy oǵan shuǵyl qońyraý shaldy. Ol vokzal mańynda ornalasqan úıdiń ekinshi qabatyndaǵy páterde órt shyqqanyn habarlady.
Dereý oqıǵa ornyna barǵan Álıhan Ahmetov tótenshe jaǵdaıǵa tap boldy. Kólik polıtseıi órt taraǵan sátte kelip, jedel jaǵdaıdy saralap, dereý áreket etýge kóshedi.
Qatty tútin men qaýipke qaramastan, polıtsııa qyzmetkeri ǵımarattan adamdardy evakýatsııalaı bastady.
- Ol kámeletke tolmaǵan úsh bala men ájeıdiń shyǵýyna kómektesti. Órt sóndirý bólimine jedel habarlasyp, 101 nómirine qońyraý shaldy. Sonymen qatar, qatardaǵy Ahmetov ishinde eshkim qalmaǵanyna kóz jetkizý úshin janyp jatqan páterge kirýden qoryqpady. Alaıda, órt pen tútinniń qarqyndylyǵyna baılanysty polıtsııa qyzmetkeri bólmeni tekserýdi jalǵastyra almady. Ózin qutqaryp qalý úshin ol ekinshi qabattan sekirdi, - dep jazady Kóliktegi polıtsııa departamentiniń baspasóz qyzmeti.
21 jastaǵy qatardaǵy polıtseı Álıhan Ahmetov ІІO-da 2025 jyldyń qańtarynan bastap qyzmet etip keledi. Onyń tótenshe jaǵdaıdaǵy áreketi batyldyq pen adaldyqtyń jarqyn úlgisi boldy.
Jas bolǵanyna qaramastan, Álıhan erekshe tabandylyq pen tótenshe jaǵdaılarda áreket etýge daıyn ekenin kórsetti. Onyń áreketi áriptesteri úshin shabyt berip, qyzmetke degen adaldyq úlgisin tanytty.
Sondaı-aq áriptesteri jas qyzmetkerdiń aldaǵy ýaqytta da antyna berik bolatynyna zor senim artady.
Aıta keteıik, buǵan deıin Atyraý oblysyndaǵy Batys Prorva ken ornynda aýaǵa gaz atqylady.