Kólik óndirisiniń jartysy Almatyǵa tıesili: qalǵany qaı óńirde
ASTANA. KAZINFORM — Qazaqstanda jeńil avtokólik óndirisi artty. 2026 jylǵy qańtar-qyrkúıek aılarynda 136 548 jeńil avtokólik óndirildi. Bul 2025 jyldyń sáıkes kezeńimen salystyrǵanda 38%-ǵa joǵary.
Ulttyq statıstıka bıýrosynyń baspasóz qyzmetiniń deregine sáıkes, qyrkúıek aıynda 19 377 jeńil avtokólik shyǵaryldy. Óndiris kólemi ótken jyldyń osy aıymen salystyrǵanda 66,4%-ǵa, al aǵymdaǵy jyldyń tamyz aıymen salystyrǵanda 35,5%-ǵa kóp.
— Qazaqstanda avtokólik óndirýmen 12 kásiporyn aınalysady. Jeńil avtokólik óndirisiniń negizgi kólemi Almaty qalasy men Qostanaı oblysyna tıesili. Olardyń úlesi tıisinshe 50,5% jáne 49,5%-dy quraıdy, — delingen statıstıkalyq málimetterde.
2026 jylǵy qańtar-qyrkúıek aılarynda «Avtokólikter, tirkemeler jáne jartylaı tirkemeler» sanaty boıynsha ónerkásip óniminiń kólemi aqshalaı mánde 1,67 trln teńgege jetti. Osy sanattaǵy ónerkásip óndirisiniń ındeksi ótken jyldyń sáıkes kezeńimen salystyrǵanda 129,9% deńgeıinde qalyptasty.
2026 jylǵy qyrkúıekte óndirilgen ónim kólemi 198,4 mlrd teńgeni qurady. Bul kórsetkish aqshalaı mánde 2026 jylǵy tamyzben salystyrǵanda 25,7%-ǵa, al 2025 jylǵy qyrkúıekpen salystyrǵanda 10,5%-ǵa ósti.
Buǵan deıin Qazaqstanda qaı otynmen júretin kólik túri kóp ekenin jazǵanbyz.
