Kólik nómirin ádeıi qaǵazben japqan jambyldyq júrgizýshi jaýapqa tartyldy
ASTANA. KAZINFORM — Jalpy oblys kóleminde jyl basynan beri memlekettik nómirin jasyrǵan 88 quqyq buzýshy anyqtaldy, dep habarlaıdy QR Іshki ister mınıstrliginiń baspasóz qyzmeti.
Jambyl oblysynda polıtsııa qyzmetkerleri aýmaqty patrýldeý barysynda Batys Eýropa — Batys Qytaı avtojolynyń 487-shaqyrymynda nómiri anyq kórinbegen KIA K5 avtokóligin baıqap, toqtatty.
— Tekserý kezinde kóliktiń memlekettik tirkeý nómirindegi áriptik-tsıfrlyq belgilerdiń bir bóligi qaǵazben ádeıi jabylǵany anyqtaldy. Bul beınebaqylaý kameralary arqyly memlekettik nómirdi tolyq kórýge jáne kólikti sáıkestendirýge kedergi keltirgen. Júrgizýshige qatysty zań aıasynda shara qoldanyldy. Avtokólik arnaıy aıyp turaǵyna qoıyldy, — deıdi polıtsııa qyzmetkerleri.
Atalǵan quqyq buzýshylyq úshin bes táýlikke deıin ákimshilik qamaýǵa alý jáne bir jyl merzimge kólik quralyn basqarý quqyǵynan aıyrý jazasy kózdelgen.
Jalpy, oblys kóleminde jyl basynan beri memlekettik nómirin jasyrǵan 88 quqyq buzýshy anyqtaldy.
Qazir óńirde respýblıkalyq «Quqyqtyq tártip» jedel aldyn alý is-sharasy ótkizilip jatyr. Onyń aıasynda polıtsııa qyzmetkerleri qoǵamdyq tártipti saqtaý, quqyq buzýshylyqtardyń aldyn alý jáne jol qaýipsizdigin qamtamasyz etý boıynsha jumystardy kúsheıtti.
Buǵan deıin Jambylda birneshe jyl boıy izdeýde júrgen 9 qylmysker ustalǵanyn jazdyq.
