Kólik mınıstrligi júrgizýshilerge úndeý jasady
ASTANA. KAZINFORM – Jazǵy maýsymda respýblıkalyq mańyzy bar avtomobıl joldarynda kólik qozǵalysy kúsheıgenine baılanysty Kólik mınıstrligi júrgizýshilerdi jol qozǵalysy qaǵıdalaryn qatań saqtaýǵa shaqyrdy.
Vedomstvo júrgizýshilerge belgilengen jyldamdyq rejımin saqtaý, basyp ozý qaǵıdalaryn buzbaý, sharshaǵan kúıde kólik basqarmaý, sondaı-aq qozǵalys qarqyny joǵary ýchaskelerde jáne túngi ýaqytta erekshe saq bolý qajettigin eskertti. Sonymen qatar balalardy tasymaldaý kezinde qaýipsizdik beldikteri men arnaıy balalarǵa arnalǵan qurylǵylardy mindetti túrde paıdalaný kerektigi atap ótildi.
Taldaýǵa sáıkes, jol-kólik oqıǵalarynyń negizgi sebebi – júrgizýshilerdiń jol qozǵalysy qaǵıdalaryn saqtamaýy. Barlyq jol apatynyń 91%-y óreskel quqyq buzýshylyqtarmen baılanysty. Onyń ishinde jyldamdyqty arttyrý – 33%, kólik quralyn basqarýdy joǵaltý – 14%, araqashyqtyqty saqtamaý – 13%, jol belgileriniń talaptaryn elemeý – 10%.
«Jol qozǵalysyna qatysýshy árbir adamnyń tártibi men jaýapkershiligi jol qaýipsizdiginiń basty kepili bolyp qala beredi, óıtkeni jol-kólik oqıǵalarynyń basym bóligi adam faktorynan týyndap otyr», – dep atap ótti Kólik mınıstrligi.
Vedomstvonyń málimetinshe, 2026 jyldyń birinshi jartyjyldyǵynda respýblıkalyq mańyzy bar avtomobıl joldarynda jol-kólik oqıǵalarynyń sany 9%-ǵa azaıyp, 1 507-den 1 371 jaǵdaıǵa deıin tómendegen. Bul rette kólik qozǵalysynyń qarqyndylyǵy 37%-ǵa artyp, alty aıda 22,3 mln kólik quralyn qurady.
Jol-kólik oqıǵalarynyń azaıýyna jalpy uzyndyǵy 2,3 myń shaqyrym aqyly jol ýchaskelerinde engizilgen ortasha jyldamdyqty baqylaý júıesi de yqpal etken. Sonyń nátıjesinde atalǵan joldardaǵy jol apatynyń sany 17%-ǵa qysqarǵan.
Sońǵy bes jylda respýblıkalyq mańyzy bar 11 myń shaqyrym avtomobıl jolynyń 45%-y I jáne II tehnıkalyq sanattarǵa aýystyryldy. Nátıjesinde qarsy baǵyttaǵy kólik aǵyndary bólinip, joldyń júrý bóligi keńeıtildi. Sonymen qatar tranzıttik kólikti eldi mekenderden shyǵarý úshin 65 aınalma jol men 38 jerústi jaıaý júrginshiler ótkeli salyndy.
«Jol qozǵalysy qaýipsizdigin arttyrý baǵdarlamasy aıasynda joldaǵy jaǵdaı men jyldamdyq rejımi týraly aqparat beretin jol belgileri men aýyspaly aqparattyq tablolar ornatyldy. Sondaı-aq 22 aqyly jol ýchaskesinde jyldamdyqty baqylaýǵa arnalǵan 56 lazerlik qurylǵy iske qosyldy. Budan bólek, jyl saıyn 8 myńnan astam jol belgisi aýystyrylyp, jol tańbalary jańartylyp, baǵdarshamdar men jaıaý júrginshiler ótkelderi ornatylady», – delingen mınıstrlik habarlamasynda.
Aıta keteıik, Qyzylordada respýblıkalyq mańyzdaǵy jol boıyna avtomattandyrylǵan ólsheý stansasy ornatyldy.
