Kólik mınıstrligi júrgizýshilerdiń medıtsınalyq tekserýin rastaý normasyn ýaqytsha toqtatty
ASTANA. KAZINFORM - Bıznes qaýymdastyǵy ókilderi men «Atameken» ulttyq kásipkerler palatasynyń usynystaryn eskere otyryp, Qazaqstan Respýblıkasy Kólik mınıstrligi júrgizýshilerdiń reıs aldyndaǵy medıtsınalyq tekserýden ótkenin Kólik qujattaryn basqarýdyń biryńǵaı júıesinde (KQBBJ) rastaý tetigin qoldanýdy kózdeıtin normanyń qoldanysyn 2027 jylǵy 1 qańtarǵa deıin toqtata turý týraly sheshim qabyldady.
QR Kólik mınıstrligi baspasóz qyzmetiniń habarlaýynsha, bul sheshim naryq qatysýshylaryna jańa talaptarǵa beıimdelýge jáne júıeniń tıisti fýnktsıonalyn tolyqqandy paıdalanýǵa daıyndalý úshin qosymsha ýaqyt berý maqsatynda qabyldandy.
Sonymen qatar, atalǵan tetikti paıdalanýǵa daıyn jáne qujattardy elektrondyq formatta rásimdeýge múddeli tasymaldaýshylar KQBBJ júıesinde jumysty erikti negizde jalǵastyra alady.
Kólik qoǵamdastyǵy ókilderinen kelip túsetin suraqtarǵa baılanysty Qazaqstan Respýblıkasy Kólik mınıstrligi Kólik qujattaryn basqarýdyń biryńǵaı júıesin engizý tártibine qatysty túsinikteme beredi.
Eń aldymen, KQBBJ júıesin engizý tasymaldaýshylar úshin jańa mindettemeler júktemeıtinin atap ótken jón. Taýar-kólik júkqujaty men jol paraǵyn rásimdeý talaptary Qazaqstan Respýblıkasynyń zańnamasynda burynnan kózdelgen.
KQBBJ júıesiniń negizgi maqsaty – kólik qujattaryn qaǵaz túrinde rásimdeýdiń qoldanystaǵy protsesterin elektrondyq formatqa kóshirý jáne olardy tasymaldaý protsesine qatysýshylar úshin qoljetimdi etý.
Sondaı-aq, ınternet baılanysy turaqsyz aýdandarda jumys máselesine erekshe nazar aýdarylǵan. Mundaı jaǵdaılarda zańnamaǵa sáıkes kólik qujattaryn qaǵaz túrinde rásimdeýge jáne ınternetke qoljetimdilik qalpyna keltirilgennen keıin olardy KQBBJ júıesinde tirkeýge jol beriledi. Osylaısha, baılanys bolmaýy tasymaldaýdy júzege asyrýǵa jáne qajetti qujattardy rásimdeýge kedergi keltirmeıdi.
Mınıstrlik halyqaralyq avtomobıl tasymaldary kezinde qujattardy rásimdeý tártibin de túsindiredi. Eger tasymaldaý bir halyqaralyq tasymaldaý sharty aıasynda júzege asyrylyp, biryńǵaı halyqaralyq CMR júkqujatymen rásimdelse, onda taýar-kólik júkqujatyn jáne jol paraǵyn KQBBJ júıesinde rásimdeý men tirkeý talap etilmeıdi.
Sonymen qatar, KQBBJ júıesinde júrgizýshilerdiń reıs aldyndaǵy medıtsınalyq tekserýden ótýin rastaý tártibi jetildirildi.
Reıs aldyndaǵy medıtsınalyq tekserýdi júrgizý protsesinen medıtsına qyzmetkeri shyǵarylmaıtynyn erekshe atap ótken jón. Ózgerister tek aqparattyq júıede tekserýden ótý faktisin rastaý tetigine ǵana qatysty.
Tasymaldaýshylar kelesi nusqalardyń birin tańdaı alady:
– eger reıs aldyndaǵy tekserýdi medıtsına qyzmetkeri júrgizse, ol engizilgen málimetterdiń durystyǵyna jaýapkershilik ala otyryp, ony júıede rastaı alady;
– rastaýdyń ózge tártibi qoldanylǵan jaǵdaıda, tasymaldaýshy zańnama talaptaryna sáıkes jol paraǵynda tıisti belgini ózdiginen qoıady.
Osyǵan deıin ortasha jyldamdyq baqylaýy taǵy úsh aqyly trassada engiziletini týraly jazdyq.
