Kólik mınıstrligi joldardyń merziminen buryn tozýynyń negizgi sebepterin atady
ASTANA. KAZINFORM – Mınıstrliktiń málimetinshe, elimizdiń aýmaǵynda 60 myńǵa jýyq samosval tirkelgen. Onyń ishinde, statıstıka málimetterine sáıkes, Qytaıda óndirilgen 40 myńǵa jýyq samosval shamadan tys júktememen jalpy paıdalanymdaǵy joldarda júrip, ınertti materıaldardy tasymaldaıdy.
Osylaısha, atalǵan júk kólikteriniń salmaǵy ruqsat etilgen normadan eki ese asyp túsedi. Máselen, ruqsat etilgen júkteme 25 tonna bolsa, samosvaldar jalpy salmaǵy 35-40 tonna júkti tasymaldaıdy.
«Bul jol tóseminiń merziminen buryn tozýyna ákeletin ári keri áser etetin faktorlardyń biri. Jol qozǵalysyna karerlerde júretin aýyr júk kólikterimen qatar avtomobıl jolyna úlken salmaq túsiretin ózge de avtokólik quraldary qatysady. Olardyń qatarynda beton aralastyrǵyshtar, avtokrandar jáne basqa da aýyr avtomobılder bar», - delingen habarlamada.
Esterińizge sala keteıik, 2022 jyldyń jeltoqsanynda avtomattandyrylǵan ólsheý stantsııalaryn ornatý jáne olardyń jumys isteý tártibin anyqtaıtyn Zań qabyldanǵan bolatyn. Atalǵan zańnama júk kótergishtigi 12 tonnadan asatyn avtomobılderdi ólsheý stantsııalary arqyly ótýge mindetteıdi ári Zań talaptaryn buzý ákimshilik jazaǵa alyp keledi. Osy rette kóliktik baqylaýdy barynsha qamtamasyz etý úshin avtomattandyrylǵan ólsheý stantsııalarynyń sanyn edáýir arttyrý josparda bar.
Osylaısha, bıyl elordaǵa kireberis jerde avtomattandyrylǵan 6 jańa stantsııa ornatyldy. Qazirgi ýaqytta olar pılottyq rejımde jumys istep tur. Kóliktik baqylaý organdary qyzmetkerleriniń aıtýynsha, atalǵan sharalardy qolǵa alý arqyly aýyr salmaqty avtomobıl kólik quraldarynyń qozǵalysyn baqylaýǵa qatysty máselelerdi sheshý jáne sybaılas jemqorlyq táýekelderin azaıtý kózdelip otyr.
