Kólik mınıstrligi Sanjar Boqaevtyń kezekti synyna jaýap berdi
ASTANA. KAZINFORM – Qoǵam belsendisi Sanjar Boqaev áleýmettik júk tranzıtine beriletin ruqsat blankisi satylyp jatqanyn áshkereleıtin «Operatsııa «dozvol» atty zertteý jarııalaǵan bolatyn. Kólik mınıstrligi osy materıalda vedomstvoǵa qaratyla aıtqan synǵa jaýap berdi.
«Áleýmettik jelilerde sheteldik ruqsat blankilerin satý faktisi týraly beınejazba jarııalanǵan bolatyn. Osyǵan oraı Kólik mınıstrligi kelesini málimdeıdi. Sóz bolyp otyrǵan latvııalyq ruqsat blankisin jeke kásipker Sofi-trans bıyl 31 qańtarda alǵan. Osy rette atalǵan ruqsat blankisin satý faktisi boıynsha tıisti materıaldar Shymkent qalasynyń polıtsııa jáne ekonomıkalyq tergeý departamentterine joldandy. Jalpy ótken jyly uqsas faktiler boıynsha 27 josyqsyz kompanııa anyqtalyp, halyqaralyq tasymaldarǵa ruqsat beretin kýálikterdiń kúshi joıylǵan bolatyn. Beınerolıktegi jazba barysynda sarapshy oı-pikirin bildirip, onda «qaıta tirkeýdiń nátıjesinde Reseıge de, Belarýske de sanktsııalyq júk tasymaldanady, ıaǵnı áskerı maqsatta qoldanýǵa bolatyn mıkroshemalar jáne taǵy basqalar» delingen (avtordyń emlesi men tynys belgileri saqtalǵan). Shekarada júkterdiń jekelegen túrleri boıynsha reeksportty boldyrmaý maqsatynda eksporttyq baqylaý júzege asyrylady. Osy rette kórineý jalǵan aqparatty taratý zańnamada kózdelgen jaýaptylyqqa ákep soǵatynyn aıta ketken oryndy», - dep jazylǵan resmı málimette.
Vedomstvonyń dereginshe, sońǵy 15 jylda Qazaqstanda shet memleketterdiń qatysýymen 63-ke jýyq birlesken kásiporyn tirkelgen.
«Olar qajetti salyqtar men alymdardy tólep, azamattardy qosymsha jumys oryndarymen qamtyp otyr. QR Qarjy mınıstrligine qarasty Memlekettik kirister komıtetiniń saıtynda jarııalanǵan resmı derekter boıynsha 2023 jyly atalǵan kásiporyndardan memlekettik bıýdjetke túsetin salyq túsimderi shamamen 12 mlrd teńgeni qurady. Aıta keterligi, qazirgi ýaqytta Kólik mınıstrligi ruqsat blankilerin bólý boıynsha jańa aqparattyq júıeni ázirledi. Atalǵan júıe tasymaldaý naryǵyna teń qol jetkizý úshin jaǵdaı jasaı otyryp, kóleńkeli naryqta blankilerdi alypsatarlyqqa jol bermeı, naqty qajettiligi bar tasymaldaýshylardy ruqsat blankilerimen qamtamasyz etedi dep josparlanǵan», - dep jazady mınıstrlik mamandary.
Sondaı-aq resmı málimette sheteldik ruqsat blankilerin satý nemese sybaılas jemqorlyq faktileri boıynsha zańsyz is-áreketterdiń kýási bolǵan jandar Kólik mınıstrliginiń Avtomobıl kóligi jáne kóliktik baqylaý komıteti tóraǵasynyń orynbasary Selım Qýanyshulyna habarlasa alatyny aıtylǵan.
