Kólik mınıstrligi poıyzdardy ınternetpen qamtýdy jyl sońyna deıin aıaqtaýdy tapsyrdy
ASTANA. KAZINFORM — Qazaqstanda jyl sońyna deıin jolaýshylar poıyzdaryn ınternetpen jabdyqtaý aıaqtalady.
Qazaqstanda jolaýshylar poıyzdaryn spýtnıktik ınternetpen qamtamasyz etý jumystary jalǵasyp jatyr. Kólik mınıstrligi áleýmettik mańyzy bar baǵyttar boıynsha jolaýshylar tasymalyn júzege asyratyn kompanııalarmen jıyn ótkizip, birinshi jartyjyldyqtyń qorytyndysyn shyǵardy jáne salany odan ári damytý máselelerin talqylady.
Jıynda qaralǵan negizgi máselelerdiń biri — jolaýshylar poıyzdaryn ınternetpen qamtý boldy. Qazirgi tańda Qyzylorda — Pavlodar, Jezqazǵan — Astana, Astana — Semeı, Almaty — Dostyq jáne Qyzylorda — Kókshetaý baǵyttaryndaǵy poıyzdarda spýtnıktik ınternet jumys isteıdi.
Mınıstrliktiń málimetinshe, spýtnıktik baılanys uıaly baılanys operatorlarynyń qamtý aımaǵynan tys temirjol ýchaskelerinde de turaqty ınternetke qol jetkizýge múmkindik beredi. Sonyń arqasynda jolaýshylar messendjerlerdi, áleýmettik jelilerdi, jumys servısterin jáne basqa da onlaın-platformalardy paıdalana alady.
Internetke qosylý úshin poıyzdaǵy Wi-Fi jelisin tańdap, avtorızatsııadan ótý qajet. Osydan keıin jolaýshylar WhatsApp pen Telegram arqyly mátindik habarlamalardy tegin jibere alady. Al áleýmettik jelilerdi, beıneservısterdi jáne basqa da ınternet-resýrstardy tolyq paıdalaný úshin aqyly tarıfti qosýǵa bolady.
Jıyn qorytyndysynda Kólik mınıstrligi tasymaldaýshylarǵa jolaýshylar poıyzdaryn ınternetpen jabdyqtaý jumystaryn jedeldetip, ony osy jyldyń sońyna deıin tolyq aıaqtaýdy tapsyrdy.
Eske salaıyq, buǵan deıin Astana — Semeı — Dostyq poıyzynda spýtnıktik ınternet iske qosylǵanyn habarlaǵan edik.
