Kólik mınıstrligi Oral áýejaıyn jańǵyrtý úshin birqatar naqty mindet júktedi
ASTANA. KAZINFORM — Oral halyqaralyq áýejaıyn damytý jáne avıatsııalyq ınfraqurylymdy jańartý boıynsha jaýapty uıymdarǵa naqty tapsyrmalar berildi.
Qazaqstan Respýblıkasy Kólik mınıstrligi men Batys Qazaqstan oblysy ákimdigi ókilderi áýejaıdaǵy jobalardyń júzege asyrylý barysyn tekserip, aldaǵy jumystardy talqylady.
Jumys keńesinde ushý-qoný jolaǵyn jóndeý, áýejaıdyń perımetrlik qorshaýyn jańartý, arnaıy tehnıkalar parkin tolyqtyrý, aeronavıgatsııalyq júıelerdi jetildirý jáne janarmaı ınfraqurylymyn jańǵyrtý boıynsha naqty mindetter belgilendi.
Sonymen qatar Oral áýejaıynyń halyqaralyq baǵyttaryn keńeıtý, Atyraý jáne Aqtóbe qalalarymen áýe qatynasyn qaıta jandandyrý, shaǵyn avıatsııany damytý jáne ınvestıtsııalyq jobalardy iske asyrý boıynsha jaýapty mekemelerge tapsyrmalar júkteldi.
Kólik mınıstrligi barlyq jumysty belgilengen merzimde oryndaýdy tapsyrdy. Ár baǵyt boıynsha jaýapty oryndaýshylar bekitilip, jobalardyń júzege asyrylý barysy mınıstrliktiń baqylaýyna alyndy.
Vedomstvonyń málimetinshe, jańǵyrtý jumystarynyń nátıjesinde ushý qaýipsizdigi artyp, áýe baǵyttarynyń geografııasy keńeıip, jolaýshylarǵa kórsetiletin qyzmet sapasy jaqsarady.
Aıta keteıik, keıingi úsh jylda Oral áýejaıynda jolaýshylar aǵyny 85%-ǵa, júk aınalymy 89%-ǵa, al oryndalǵan áýe reısteriniń sany 51%-ǵa ósken. Búginde áýejaı bes ishki baǵytpen qatar Ystambul, Antalııa, Sharm-esh-Sheıh, Fýkýok jáne Frankfýrt qalalaryna halyqaralyq reıster oryndaıdy.
Eske salaıyq, buǵan deıin Arqalyq áýejaıy alǵashqy reısti qabyldaýǵa daıyndalyp jatqanyn jazǵanbyz.
