Kólik mınıstrligi men Eýropalyq ınvestıtsııalyq bank yntymaqtastyǵyn keńeıtedi

ASTANA. KAZINFORM – Kólik mınıstrliginde Qazaqstan Respýblıkasy Kólik vıtse-mınıstri Talǵat Lastaev Eýropalyq ınvestıtsııalyq bank (EIB) delegatsııasymen kezdesý ótkizdi. Bul týraly vedomstvonyń baspasóz qyzmeti málim etti. 

Kezdesýdiń maqsaty — kólik ınfraqurylymyn damytý salasyndaǵy bastamalardy talqylaý jáne yntymaqtastyqtyń jańa baǵyttaryn aıqyndaý boldy.

Kelissózder barysynda taraptar avtomobıl joldary salasynda iske asyrylyp jatqan jáne perspektıvalyq jobalardy qarastyrdy.

EIB ókilderi birlesken bastamalardyń oń qarqynyn atap ótip, jańa ınvestıtsııalyq múmkindikterdi qarastyrýǵa daıyn ekenderin jetkizdi.

— Temirjol sektorynyń bolashaq jobalaryna da erekshe nazar aýdaryldy. Atalǵan jobalar ótkizý qabiletin arttyrýǵa, tranzıttik áleýetti damytýǵa jáne logıstıkalyq baǵyttardy jetildirýge baǵyttaldy. Sonymen qatar sý kóligin damytýǵa qatysty josparlar talqylanyp, onyń ishinde port ınfraqurylymyn jańǵyrtý jáne ishki sý joldarynyń tıimdiligin arttyrý máseleleri qamtyldy, — delingen habarlamada.

Taraptar áriptestikti nyǵaıtýdyń mańyzdylyǵyn atap ótip, Qazaqstannyń ornyqty jáne básekege qabiletti kólik júıesin damytýǵa yqpal etetin keshendi sheshimder ázirleý boıynsha jumysty jalǵastyrýǵa kelisti.

Eske sala keteıik, buǵan deıin Kaspıı teńizi arqyly konteıner tasymalyn ulǵaıtý úshin Ázerbaıjannan eki keme satyp alynatynyn Kólik mınıstri Nurlan Saýranbaev aıtty. Ol osy jıynda Aqtaý men Quryq porttaryndaǵy kólik ınfraqurylymyn jaqsartý jumystaryn baıandady.