Kólik mınıstrligi «Qostanaı-Almaty» poıyzynda túsirilgen beınejazbaǵa qatysty pikir bildirdi
Janjigit Omarhan Facebook paraqshasyndaǵy jazbasynda Kólik mınıstrliginiń basshylyǵy beınejazbany qarap shyǵyp, tekserý sharalaryn jedel júrgizýge buıryq bergenin atap ótti, dep habarlaıdy Kazinform.
Esterińizge sala keteıik, bloger óziniń beıne habarlamasynda temirjol vagondarynyń tehnıkalyq jaǵdaıyna eskertý jasap, týrızm jáne kólik mınıstrlerin poıyzben «júrip ótýge» shaqyrǵan bolatyn.
Kólik mınıstrliginiń ókilderi eń aldymen beıne jazbanyń qanshalyqty ózekti ekendigin anyqtady. Nátıjesinde jazba avtory 13-14 jeltoqsan aralyǵynda «Qostanaı-Almaty» baǵytynda qatynaıtyn №43/44 jolaýshylar poıyzynyń №2 vagonymen jolǵa shyqqany belgili boldy.
Sondaı-aq zaýyttyq nómiri 02/26210 vagon Astana trans group JShS jeke tasymaldaýshysyna tıesili ekeni jáne 1989 jyly jasalǵany, sonymen birge josparly kúrdeli jóndeý jumystary maýsym aıynda, al ekinshi ret tekserý qysqy tasymaldaýǵa daıyndyq kezinde, ıaǵnı qyrkúıekte júrgizilgeni anyqtaldy.
Tasymaldaýshy kompanııanyń ókilderi atalǵan reıstiń jolaýshylary jolserikterge nemese poıyz bastyǵyna temperatýranyń qolaısyzdyǵyna baılanysty shaǵymdanbaǵanyn aıtady. Jeltoqsannyń 13-inen 14-ine qaraǵan túni aımaqta aýa temperatýrasy -30 gradýsqa deıin tómendedi. Oǵan qosa, beınejazbada kórinip turǵandaı, avtor ústine jaı ǵana jeńil fýtbol kıip, túsirilim júrgizgen. Bul da óz kezeginde vagondaǵy temperatýranyń qolaıly bolǵandyǵyna meńzeıdi.
J.Omarhan jolaýshylar tasymaly salasyndaǵy ýákiletti memlekettik organ elimizdegi jolaýshylar vagondarynyń tehnıkalyq jaı-kúıi týraly habardar ekenin atap ótti.
«Jolaýshylar vagondarynyń otandyq parkiniń tehnıkalyq jaı-kúıine toqtalatyn bolsaq, mınıstr Marat Qarabaev jyl kóleminde qazaqstandyq vagondardyń ortasha tozýy sońǵy jyldary 45%-ǵa deıin tómendegenin aıtyp keledi. Álbette, bul kóńil kónshitpeıtin kórsetkishter. Sondyqtan jańa vagondardy satyp alý boıynsha jumystar odan ári jalǵasyp jatyr. Bıyl 162 vagon satyp alyndy. Qazirgi ýaqytta onyń 88-i jetkizilip, 2024 jyldyń shildesine deıin taǵy 62-si jolaýshylar tasymalyna shyǵady degen jospar bar. Kelesi jyly Petropavl zaýytynan shyǵatyn taǵy 157 jańa vagon satyp alynbaq. Sonymen birge osydan bir jyl buryn «Stadler Qazaqstan» JShS-men 537 birlik Stadler jolaýshylar vagonyn satyp alý jóninde kelisimshart jasaldy», – dep atap ótti baspasóz hatshysy.
Beınejazba avtory sondaı-aq kólik mınıstrin temirjol kóligimen júrip ótýge shaqyrǵan eken. Bul rette mınıstrlik ókili ótken aptada Marat Kárimjanuly Soltústik Qazaqstan oblysyna jumys sapary barysynda oblys ortalyǵy Petropavl qalasyna poıyzben barǵanyn aıtty.
