Kólik salasyndaǵy eki laýazymdy tulǵa 40 mln teńgeden astam para aldy degen kúdikke ilindi
ASTANA. KAZINFORM- QR Ulttyq qaýipsizdik komıtetiniń Sybaılas jemqorlyqqa qarsy is-qımyl qyzmeti kólik salasyndaǵy sybaılas jemqorlyq quqyq buzýshylyqtardyń jolyn kesý boıynsha júıeli jumys júrgizip jatyr, dep habarlaıdy komıtettiń baspasóz qyzmeti.
Bıyl tamyzda prokýratýranyń úılestirýimen Kólik mınıstrliginiń Avtomobıl kóligi jáne kóliktik baqylaý komıteti tóraǵasynyń orynbasary men Aqmola oblysy boıynsha kólik baqylaýy ınspektsııasy basshysynyń orynbasary ustaldy.
Olar júkteri ruqsat etilgen salmaq normalarynan asyp ketken kólik quraldarynyń kedergisiz júrýin qamtamasyz etý jónindegi quqyqqa qarsy áreketterge kúdikti.
Tergeý málimetterine sáıkes, atalǵan adamdar kásipkerlerden 40 mln teńgeden astam somaǵa materıaldyq syıaqy alǵan.
Sot sanktsııasymen atalǵan adamdar qamaýǵa alyndy.
Sotqa deıingi tergep-tekserý júrgizilip jatyr.
Qylmystyq-protsestik kodekstiń 201-babyna sáıkes ózge aqparat jarııa etýge jatpaıdy.
Aıta keteik, osyǵan deıin «QazAvtoJol» ulttyq kompanııasynyń baspasóz qyzmeti artyq júk máselesiniń aýqymyn jarııalady. Aıtýlarynsha, bir myńǵa jýyq kólik 200 tonnadan artyq júkpen júrgen.
