Kólik mınıstrligi áýe tasymaly qaǵıdalaryn jańartýdy usyndy
ASTANA. KAZINFORM — Qazaqstannyń Kólik mınıstrligi jolaýshylardy, bagaj ben júkti áýe kóligimen tasymaldaý qaǵıdalaryna ózgerister engizý týraly buıryq jobasyn ázirledi.
Qujat «Ashyq NQA» portalynda jarııalanyp, 27 shildege deıin qoǵamdyq talqylaýda bolady.
Túsindirme jazbada joba qoldanystaǵy qaǵıdalardy zańnamaǵa jáne Halyqaralyq áýe kóligi qaýymdastyǵynyń (IATA) usynymdaryna sáıkestendirý úshin ázirlengeni aıtylǵan. Sondaı-aq oǵan azamattardyń ótinishteri, Bas kólik prokýratýrasy men Almaty kólik prokýratýrasynyń usynystary, sondaı-aq Shymkent kólik prokýratýrasynyń narazylyǵy negiz bolǵan.
Joba áýe tasymalyn uıymdastyrýǵa qoıylatyn negizgi talaptardy jańartýdy kózdeıdi.
Atap aıtqanda, onda áýe tasymaly shartyn jasaý, bılet rásimdeý jáne oryn brondaý tártibi naqtylanǵan.
Sonymen birge jolaýshylar men áýe kompanııalarynyń quqyqtary men mindetteri, onyń ishinde áýe bıletterin qaıtarý sharttary da qaıta qaralady.
Qujatta jolaýshylardyń quqyqtaryn qorǵaýǵa erekshe kóńil bólingen. Atap aıtqanda, múgedektigi bar adamdarǵa, kámeletke tolmaǵandarǵa jáne júkti áıelderge qyzmet kórsetý tártibi, sondaı-aq reıs keshikken nemese keıinge shegerilgen jaǵdaıda kórsetiletin qyzmetter naqty jazylǵan.
Budan bólek, ulttyq mýzykalyq aspaptar men janýarlardy ushaq salonynda tasymaldaýǵa qatysty ózgerister de usynylǵan.
Kólik mınıstrliginiń málimetinshe, buıryq jobasyn qabyldaý áleýmettik-ekonomıkalyq jáne quqyqtyq turǵydan teris saldarǵa ákelmeıdi.
Aıta keteıik, buǵan deıin Eýroparlament balamen birge saparlaıtyn otbasylarǵa ushaqta qatar ornalasqan oryndardy qosymsha aqysyz tańdaýǵa múmkindik beretin jańa erejelerdi maquldaǵan bolatyn.
