Kólik mınıstrligi Astanada júk kólikterine baqylaýdy kúsheıtti
ASTANA. KAZINFORM — 1 sáýirden bastap Astana qalasynyń aýmaǵynda Kólik mınıstrligi, Polıtsııa departamenti jáne Astana qalasynyń ákimdigi birlesip aýyr júk tasymaldaıtyn samosvaldardyń qozǵalysyn baqylaýdy kúsheıtýge baǵyttalǵan reıdtik is-sharalar ótkizip jatyr.
Negizgi nazar ınertti materıaldardy tasymaldaıtyn avtokólik quraldarynyń ruqsat etilgen salmaqtyq jáne gabarıttik parametrlerin saqtaýyna aýdarylyp otyr.
Baqylaý is-sharalarymen qalanyń negizgi kireberisteri, sondaı-aq qurylys júkteri qarqyndy tasymaldanatyn kóshe ýchaskeleri qamtylǵan.
Kúsheıtý sharalary aıasynda kóliktik baqylaýdyń 6 jyljymaly beketi jumyldyryldy. Sonymen qatar, elimizdiń 17 óńirinen kóliktik baqylaý ınspektsııalarynyń qyzmetkerleri tartyldy.
— Reıdtik is-sharalar bastalǵaly beri 622-ge jýyq avtokólik tekserilip, nátıjesinde kólik zańnamasynyń talaptaryn buzýdyń
347 faktisi anyqtaldy, onyń ishinde artyq júkteý jaǵdaılary bar. Anyqtalǵan quqyq buzý boıynsha 92 mıllıon teńgeden astam somaǵa aıyppul salyndy, — delingen mınıstrlik habarlamasynda.
Ótkizilip jatqan is-sharalar jol ınfraqurylymyn saqtaý, jol qozǵalysy qaýipsizdigin qamtamasyz etý jáne avtomobıl joldarynyń merziminen buryn tozýyn boldyrmaýǵa baǵyttalǵan.
Kólik mınıstrligi júrgizýshiler men tasymaldaýshylardy Qazaqstan Respýblıkasynyń qoldanystaǵy zańnamasynyń talaptaryn qatań saqtaýǵa, kólik quraldaryna artyq júk artpaýǵa jáne jol jelisin paıdalanýǵa jaýapkershilikpen qaraýǵa shaqyrady.
Aıta ketelik elektrondyq kezek arqyly shekaradan 1 mln astam júk kóligi ótken.
