Kólik mınıstrligi Astana – Frankfýrt reısine qatysty oqıǵany tergep-tekseredi
ASTANA. KAZINFORM – 2026 jylǵy 8 mamyrda Astana – Frankfýrt baǵyty boıynsha KZR921 reısin oryndaý kezinde «Air Astana» AQ-nyń EI-KGJ tirkeý nómirli Airbus A321 áýe kemesimen avıatsııalyq oqıǵa boldy.
Astana áýejaıynan ushyp shyqqannan keıin áýe kemesiniń ekıpajy qozǵaltqyshtardyń biriniń isten shyǵýyna baılanysty PAN-PAN shuǵyl dabylyn jarııalady. Osyǵan baılanysty ekıpaj Aqtóbe qalasynyń qosalqy áýejaıyna qoný týraly sheshim qabyldady.
Áýe kemesiniń bortynda 93 jolaýshy, onyń ishinde 4 bala men 1 náreste, sondaı-aq ekıpajdyń 9 múshesi bolǵan.
Áýe kemesi Aqtóbe áýejaıyna jergilikti ýaqyt boıynsha saǵat 11:34-te shtattyq rejımde qondy. Ekıpaj áýe kemesiniń jedel paıdalaný jónindegi anyqtamalyǵynda (QRH – Quick Reference Handbook) kózdelgen rásimderge sáıkes áreket etti. Qonǵannan keıin áýe kemesi turaq ornyna ózdiginen jetti. Qaýipsizdikti qamtamasyz etý maqsatynda áýejaıdyń avarııalyq-qutqarý jáne tıisti jerústi qyzmetteri jumyldyryldy.
Avıatsııalyq oqıǵa áýe kemesiniń kúshtik qondyrǵysyndaǵy tehnıkalyq aqaýǵa baılanysty boldy. Qazirgi ýaqytta zardap shekkender nemese áýe kemesiniń zaqymdanýy týraly aqparat túsken joq.
Qazaqstan Respýblıkasy Investıtsııalar jáne damý mınıstriniń 2017 jylǵy 27 shildedegi №505 buıryǵymen bekitilgen avıatsııalyq oqıǵalar men ıntsıdentter týraly derekterdi usyný jáne olardy tergep-tekserý qaǵıdalaryna sáıkes atalǵan avıatsııalyq oqıǵa aýyr ıntsıdent retinde jiktelip, ony Qazaqstan Respýblıkasy Kólik mınıstrliginiń Kóliktegi oqıǵalar men ıntsıdentterdi tergep-tekserý departamenti tergeıtin bolady.
Alǵashqy is-sharalardy júrgizý jáne aqparat jınaý maqsatynda avıatsııalyq oqıǵa ornyna Departament qyzmetkeriniń barýy josparlanyp otyr.
Eske sala keteıik, buǵan deıin Astana–Frankfýrt baǵytyndaǵy ushaq Aqtóbege shuǵyl qonǵanyn habarlaǵanbyz.
