Kólik mınıstrligi «Aeroflot» áýe kompanııasyna qatysty jaǵdaıdy túsindirdi

ASTANA. KAZINFORM — Búgin kompanııanyń aqparattyq júıesinde tehnıkalyq aqaý boldy. SU1962/1963 «Máskeý — Astana — Máskeý» reısi tehnıkalyq sebepterge baılanysty oryndalmaǵan, dep habarlaıdy Kólik mınıstrligi.

«Aeroflot» áýe kompanııasynyń málimetinshe, búgin kompanııanyń aqparattyq júıesinde tehnıkalyq aqaý boldy. Kompanııa ókilderi bul aqaý tek Reseı ishinde oryndalatyn ishki áýe reısterin retteıtin ishki IT-júıelerge ǵana qatysty ekenin habarlady.

Atalǵan tehnıkalyq aqaý halyqaralyq reısterge, sonyń ishinde Qazaqstan baǵytyndaǵy reısterge áser etpeıdi. Qazaqstanǵa jáne Qazaqstannan oryndalatyn reıster qoldanystaǵy kestege sáıkes júzege asyrylyp jatyr, reısterdi toqtatý josparlanbaǵan.

Sonymen qatar, SU1962/1963 «Máskeý — Astana — Máskeý» reısi tehnıkalyq sebepterge baılanysty oryndalmaǵan.

— Barlyq jolaýshylarǵa habarlama jiberildi, tasymaldaý SU1914/1915 reısimen júzege asyrylady. Reıstiń mártebesi ózgergen jaǵdaıda barlyq qyzmet qoldanystaǵy zańnamaǵa sáıkes usynylady. Kompanııa barlyq jolaýshyǵa reısterdiń mártebesin aldyn ala tekserip otyrýdy usynady, — delingen habarlamada. 

Mınıstrlik «Aeroflot» áýe kompanııasynyń ókilderimen jedel keńes ótkizdi, onyń barysynda jolaýshylarǵa aldyn ala aqparat berý jáne tıisti qyzmetter kórsetý qajettigi atap ótildi.

— Bul másele mınıstrliktiń erekshe baqylaýynda, — dep atap ótti mınıstrlik.

Keshe keshke áleýmettik jelide Astana áýejaıyn sý basqan beınejazba tarady. Áýejaıdyń baspasóz qyzmeti jaǵdaıdyń sebebin túsindirdi.