Kólik mınıstrligi Abyl Kekilbaevtyń synyna jaýap berdi

ASTANA. KAZINFORM – Kólik mınıstrligi Kazinform saýalyna joldaǵan jaýabynda Qazaqstanda nege azamattyq avıatsııany damytýdyń ulttyq strategııasy joq ekenin aıtty.

Avıatsııa salasynyń belgili mamany Abyl Kekilbaev Qazaqstannyń azamattyq avıatsııa salasynda ulttyq strategııa joq ekenin problema etip kóterip júr. Mınıstrlik osy synǵa bylaı dep jaýap berdi.

«Azamattyq avıatsııa salasy ICAO-nyń (Halyqaralyq azamattyq avıatsııa uıymy – red.) 1992 jyly ratıfıkatsııalanǵan Chıkago konventsııasymen jáne «QR áýe keńistigin paıdalaný jáne avıatsııa qyzmeti týraly» salalyq Zańymen retteledi. Úkimettiń 2022 jylǵy 30 jeltoqsandaǵy № 1116 qaýlysymen Qazaqstan Respýblıkasynyń kólik-logıstıkalyq áleýetin damytýdyń 2030 jylǵa deıingi tujyrymdamasy qabyldanǵanyn habarlaımyz. Tujyrymdama sheńberinde áýejaılardyń ınfraqurylymy men jaraqtandyrylýy ICAO men IATA talaptaryna sáıkes keltirý, onyń ishinde radıotehnıkalyq, jaryq-sıgnaldyq jáne meteorologııalyq jabdyqtarmen jaraqtalý deńgeıin arttyrý, ushý-qoný jolaqtaryn, perrondardy jańǵyrtý jáne keńeıtý, otyn-janarmaı quıý keshenderin damytý, «ashyq aspan» saıasatyn odan ári iske asyrýmen qatar álemdik qarjy ortalyqtarymen tikeleı áýe qatynastaryn ashý jalǵasady. Sondaı-aq, aeronavıgatsııanyń zamanaýı jáne perspektıvaly tehnologııalaryn engizý júrgiziledi», - delingen resmı jaýapta.

Mınıstrlik jaýabynda Prezıdent joldaýy aıasynda Ulttyq ınfraqurylym josparynyń jobasy ázirlenip jatqany da aıtylǵan.