Kólik mınıstrligi 22 áýejaıdy ınvestorlardyń basqarýyna berýdi josparlap otyr
ASTANA. KAZINFORM – Qazaqstan óz aýmaǵynda qurlyqtaǵy tranzıttik hab qurý úshin 22 áýejaıdy ınvestorlardyń basqarýyna berýdi josparlap otyr. Kólik mınıstri Marat Qarabaev Belgııa astanasy Brıýsselde ótken forýmynyń ashylý saltanatynda osyndaı málimet aıtty.
Marat Qarabaev Eýrokomıssııa ókilderine Qazaqstan aýmaǵyn Eýropa men Azııa arasyndaǵy negizgi jáne ornyqty tranzıttik baǵyt retinde paıdalanýdy usyndy. Onyń sózinshe, Qazaqstan aldaǵy 5 jylda kólik salasyndaǵy negizgi ınfraqurylymdyq jobalarǵa 40 mlrd eýro ınvestıtsııa tartýǵa nıetti.
«Osy kezeńde uzyndyǵy 4,7 myń shaqyrym tranzıttik dálizderdi qaıta jańartý jáne Transkaspıı halyqaralyq kólik marshrýtyna jatatyn joldardy jóndeý josparlanyp otyr. Jobalardy iske asyrý úshin Global Gateway bastamasy aıasynda qarajat tartýdy usynamyz jáne eýropalyq merdiger uıymdardy Qazaqstannyń avtojoldar qurylysynyń úlken jobasyna qatysýǵa shaqyramyz», - dedi mınıstr.
Vedomstvo basshysy temirjol salasynda jalpy uzyndyǵy 1 300 shaqyrym bolatyn jańa magıstraldar salynyp, qoldanystaǵy ınfraqurylym jańartylatynyn atap ótti.
Mınıstr azamattyq avıatsııany damytyp, qurlyqtaǵy tranzıttik hab qurý úshin 22 otandyq áýejaıdy ınvestorlardyń basqarýyna berý josparda bar ekenin aıtty. Al Aqtaý portynda teńiz flotyn nyǵaıtyp, konteınerlik hab qurý úshin ınvestorlarǵa 171 ga aýmaq beriledi. Sonymen birge Aqtaý jáne Quryq teńiz porttaryn «ship-or-pay» sharttarymen senimgerlik basqarýǵa berý múmkindigi de qarastyrylyp jatqany tilge tıek etildi.
Sóz sońynda Marat Qarabaev eýropalyq uıymdar men kompanııalardy maýsym aıynda Astanada ótetin New Silkway forýmyna qatysýǵa shaqyrdy. Sondaı-aq bıyl qyrkúıek aıynda Eýroodaq pen Qazaqstan arasyndaǵy kólik salasyndaǵy áriptestik boıynsha ınvestıtsııalyq forým uıymdastyrýdy usyndy.
